البوست المئوي..أنت تسأل ومايكل يجيب

كل سنة وأنتم طيبين..الوقت عدي وفات واديني بكتب في البوست المئوي علي مدونتي
وبما أنه بوست مش عادي من وجهة نظري،فحيكون بتاعكم أنتم
كل واحد من حقه يسألني أي سؤال وأنا حجاوب عليه(محدش طبعا يستهبل ويسألني في الفيزياء النووية) ومن حق أي حد يقترح عليا موضوع أنا ممكن أكتب فيه _لو في إستطاعتي طبعا_ وطبعا حستني رأي كل واحد في شكل المدونة الجديد اللي بتوجه فيه طبعا بالشكر للزميلة العزيزة كوكا كوكتاوي
طب تسمحولي أسأل سؤال ع الماشي من وحي المسلسلات الرمضانية
هو أنا ليه من يوم ما اتولدت بشوف شريف منير ومحمد الشقنقيري طالعين في أدوار الشاب المتخرج من الجامعة....يا تري ما هو سر الشباب الدائم؟

عن البنت والعصايا...هناك خطايا

أولا..كل سنة وانتم طيبين ورمضان كريم
ثانيا...شوفوا الفيديو ده
http://www.youtube.com/watch?v=DTFaL0aU8n0
أكيد كله سمع عن حكاية البنت صاحبة العصا اللي إتخانقت مع الشاب في الشارع والألفاظ النابية المتبادلة..المدهش أن أغلب التعليقات في اي مكان علي هذا الموضوع مش مغلطين غير البنت وبس وده يخليني أسأل كام سؤال ع الماشي كده
1-دلوقتي البنت دي أكيد غلطانة في الشتيمة ومش حدافع عنها..بس من فضلكوا حد يقولي كم مرة بيسمع سب الدين في الشوارع علنا..ولا بلاش دي..كم مرة بنسمع سب دين وسب بأحقر الالفاظ في أي ماتش كوورة ولا هي الشتيمة فخر للرجولة وحكرا عليها ولم تطلع من بنت تبقي جريمة؟
2- الحيوان اللي مصور الكليب واضح جدا تركيزه علي جسم البنت بسبب لبسها وده اللي مخلي الناس واخدة موقف منها مسبقا..لا مؤاخذة هي الناس حتلبس البنت علي مزاجهم واللي متلتزمش يبقي تستاهل اللي يجرالها يعني؟؟
3-لو أبوها ضابط زي ما بتقول ..ليه شايلة عصا معها وعرفتوا منين أنها عصا كهربية..البنت كده بالكتير محتاجة كارنيه من السيد الوالد
4-لما الشتيمة إياها طلعت..أول رد فعل كان سؤالها انتي مسلمة ولا؟..طب يعني مستر عبقرينو اللي سال هذا السؤال حتفرق مع فخامته إيه لو كانت مسلمة أو مسيحية او ملحدة حتي؟..امتي ربنا يتوب علينا من الأشكال دي بقي
5-حد يقدر ينكر أن البنت بتتعرض لمضايقات عديدة في الشوارع وكله بيحط جزمة في بقه واشمعني لازم يعني الواد هو اللي يزعق ويشتم والبنت تأخذ علي دماغها بالجزمة القديمة..هي دي رسالتها في الحياة ولا ده عشان مصلحة مصر ولا إيه بالضبط..يعني بصراحة أنا عن نفسي مشجع كل بنت أنها لو سايقة عربية يبقي معاها عصا زي دي للردع ليس أكثر أو لو ماشية علي رجلها لازم يبقي في شنطتها
self defense
و أعتقد أن الحوادث اللي بنقرأها تثبت أن القطط والكلاب في الشارع دلوقتي بتمشي في الشارع وهي امنه علي روحها اكثر من البنات ومحدش يقوللي أصلها لابسة كذا ومش لابسة كذا
6-ليه بنحب نصدر أحكام مسبقة..مش جايز جدا يكون الواد بيستهبل وعاوز فلوس زيادة من البنت نتيجة خربوش في العربية وبالذات طمع فيها أكتر بعد مظهرها الخارجي وتعاطف العامة معه؟
فكروا شوية في الأسئلة دي لان العقل نعمة ربنا اداها للإنسان