إسمع نصائح باباي

هيصنا وإتبسطنا في الالبون اللي فات مع أغاني أعياد الميلاد وأغاني إنفلونزا الخنازير..نخش بقي في الجد..يعني حنقضيها هزار ولا إيه
نسبة كبيرة منكم قرأوا السبع حلقات اللي نزلتها قبل كده في مغامراتي في إنترفيوهاتي (واللي أوعدكم بتكملة باقي الحلقات في البوستات القادمة) بس أنا حبيت المرة دي أعمل شيء إيجابي المرة دي أهو لو منفعنيش في دنيتي..ينفعني في اخرتي ومحدش ضامن عمره
يعني امبارح عرفت أن البلوج بتاعي تم حظره في دولة السودان الشقيقة وأخدت لقب المحظورة زي جماعة الإخوان..شفتوا الهنا اللي أنا فيه
المهم البوست ده عبارة عن نصائح ُمجربة من واحد خبرة وتاريخ 4 سنين في الانترفيوهات بعنوان كيف تنجح في إنترفيو وما هي أفضل الطرق لإيجاد وظيفة بشكل سريع بعد التخرج
ومحدش يستغرب إزاي أنا اللي بقول النصائح دي رغم أني عاطل..إشتروا مني بس ومش حتندموا
نخش في لموضوع
أولا:لازم تروح الإنترفيو في ميعادك ع الأقل وُيفضل تروح قبلها بعشر دقائق أو ربع ساعة عشان متديش إنطباع سيء عنك منذ البداية لأن التأخير في الانترفيو بيفسده من قبل بدايته وده عن تجربة
ثانيا:لازم تروح لابس رسمي..بمعني لو أنتي بنت أوعي تروحي مثلا لابسة جينز ولا بادي ولا ستوماك ولا كوتشي ولا صندل ولا حاجة من دي..حتلبسي جزمة سودا أو بني عادية وجاكت أو قميص أو بلوزة مقفولة..ولوأنت ولد حتلبس بدلة كاملة بالكرافتة أو ع الأقل قميص بكرافتة وبرضه مفيش كوتشي وجينز
ثالثا:لازم لما تدخل أي مكان تسلم ع الناس حتي لو كانوا بتوع الريسبشن ويكون علي وشك إبتسامة خفيفة هادئة وحاول تروح معاك قلم جاف إحتياطي لأن فيه شركات كتير بتخليك تملا إستمارة قبل ما تدخل الانترفيو،وحاول تروح معاك سي في خاصة بك لو الشركة دي متصلتش بيك عن طريق شركة توظيف أما لو كان الانترفيو عن طريق شركة توظيف ،فمتتعبش نفسك وتأخد سي في معاك لأنك حتلاقيها قدام مكتب الشخص اللي حيعمل معاك إنترفيو
رابعا:أوعي يبان أنك مخضوض من الانترفيو..متخفش مفيش حاجة بتعض هناك..اتكلم بمنتهي الثقة والهدوء وحاول وأنت قاعد متحطش رجل علي رجل ولا تبقي إيدك متكتفة..خليك مفرود ودراعاتك تكوني علس مسند الكرسي وإيدك مفتوحة..يعني بلاش الضوابع المتشبكة
خامسا:عشان أضمنلك محدش يرتبك..معظم الإنترفيوهات اللي رحتها لم تخرج عن الأسئلة دي وحكتبها بالانجليزي لأن 99% من الانترفيوهات حاليا ببتعمل كده حتي لو الشغلانة مبتسخدمش فيها حرف إنجليزي وعظيمة يا مصر
1-hello ........, how r u, speak about urself
U ll say"um fine, my name is.......graduated from faculty of ......... wz ......grade, my major study was........ while my minor was........, I got ........ grade in my project of graduation ..........
after graduation , I trained in .......... as ......../worked as ......... in ..........
my job was.............
ممكن كمان تبتدي كلام من أول تخرجك من الثانوية العامة بس راعي أن كلامك يكون المختصر المفيد وفي نفس لوقت متتكلمش بسرعة وتعمل فيها قرموطي
2-do you have any borthers or sister?
if yes,,try 2 tell i have a sister/brother studing in...../working as........
and speak about mother and father and their jobs
3-tell me 3-5 advantages and disadvantages in your personality
that is the most tricky question so ,take care and think well before answering so as to say 3 -5 disadvantages that aren't completly in contadiction with the job nature
try 2 be smart and start with your disadvantaged :D
4-what do you know about our company
well, I know that ........ is specialized in ..... or well known in .........
وعشان كده حاول تعمل سيرش ع الشركة في جوجل قبل ما تروح هناك عشان منظرك ميبقاش وحش
5-how do you see yourself in 5 years from now if you got accepted in the job?
well, I am looking forward to move on a senior position where I can prove my capabalities and build a good career in the future
ممكن يحاولوا يوقعوك ويقولوا يهمك يبقي مرتبك زاد ولا تبقي رحت وظيفة أعلي..امسك في حتة الوظيفة الأعلي وخدهم علي قد عقلهم
خامسا:وأنت ماشي ومروح سلم عليهم بنفس الابتسامة الخفيفة وصافح بتاع الانترفيو حتي لو سمعت الجملة الشهيرة بتاعة حنكلمك كمان أسبوعين..مش شرط يعني الجملة دي بتبقي بايخة في جميع الأحوال زي جملة الدكتور الشهيرة في الأفلام العربي بتاعة عملنا اللي علينا والباقي علي ربنا
سادسا:لو أنت خريج جديد ومعندكش خبرة كفاية في تدريب وخلافه يبقي روح علي طول علي شركات التوظيف وسيبلهم السي في بتاعتك مع ملاحظة أنه يتسحن تروح هناك بشحمك ولحمك ومتعملش تنك وتبعتلهم بالإيميل وبس لأن مهم جدا يشوفوك عشان يعرفوا يقدروا يوزعوك فين وخلي بالك ..عادي جدا فيه شركات بتأخد رسوم أنك تملأ الإستمارة عندهم تتراوح بين 5-10 جنيه ومش كلهم بيبقوا نصابين علي فكرة
سابعا:عشان أسهلها عليكوا..دي عناوين وإيميلات أبرز شركات ومواقع التوظيف وطبعا أنا مستبعد كل الأسماء اللي خدت فلوس ومجبتش وظيفة واحدة..يعني اطمنوا..أنتوا بس روحوا هناك وقولوا احنا تبع مايكل بتاع سياسة وهما حيعملوا الواجب(أوعي حد يعملها)..يلا أهي بقي
http://www.egyrec.com/
http://www.thejobmasters.com/
http://www.amcham.org.eg/
http://www.masterhr.com/
http://www.careermideast.com/
http://www.jobsinegypt.com/
http://www.el-shella.com/
http://www.jobalertegypt.com/
http://www.skill-link.com/
http://www.bayt.com/
الشركات بقي عندك شركة في 20 شارع الشهيد عبد المنعم حافظ في النزهة إسمها
performance
عندك في 90 د شأرع أحمد عرابي المهندسين شركة
chance
فيه كمان في 11 ميدان إبن عفان بالدقي شركة
jobmaster
وفيه في 55 شارع مصدق بالدقي شركة
top business
وفيه في 44 شارع جهينة بميدان الدقي شركة
job alert
وفيه في شارع 35 حسن أفلاطون بهليوبوليس شركة
multi skills
وفيه في27 شارع 276
بالمعادي الجديدة شركة إسمها
roots
وفيه شركة مش متذكر عنوانها بالضبط بس هي علي كورنيش النيل تقريبا وإسمها
aouda
يلا كفاية عليكوا كده وبلاش صداع..اللي عينه فارغة ومش مكفيه دفعة الأسماء والعناوين دي..يراسلني ع الميل ويدينا بقي طولة العمر
وإسمع نصائح باباي..تييييييت تييييييت
نلتقي في البوست القادم مع الحلقة الثامنة
أنا والإنترفيو أبو سلكة

هشتكنا وبشتكنا..ألبون جديد للكبار فقط

هابي بيزي يو يو هابي بيزي يو يو
يسر شركة جحش فون للإفتكاسات الفنية أن تقدم لكم بالتعاون مع حركة إحم إحم الفيس بوكية خامس ألبوناتها الفنية"هشتكنا وبشتكنا يا مايكل طبعا" وذلك بعد النجاح الساحق لاخر ألبوناتها "إديني في الهايف"
http://strugglingmichealitoo.blogspot.com/2009/04/blog-post.html
المرة دي الألبون تقريبا كله له طابع واحد...معلش يا شوباب..المناسبة سعيدة يعني ومش بتيجي إلا مرة كل سنة..معانا في الألبون ده كوكتيل لعمرو دياب وفيروز والعسيلي وأغاني أطفال والأغنية الرائعة
MAMMA MIA
إتفضلوا معانا وطبعا متنسوش كل واحد حيكتب كومنت حيختار أفضل أغنية في الألبون

الأولي:أوبريت أبو الفساد(أبو الفصاد) وبيحكي يا شوباب عن طائر رخم كابس علي نفس كل طيور الجنينة فقرروا يحتفلوا بعيد ميدلاده بطريقتهم..متودوناش في داهية بقي

يالا حالا بالا بالا هنوا أبو الفساد.. حيكون عيد ميلاده الليلة أسود الأعياد
هنوا أبو الفساد
يالا حالا بالا بالا هنوا أبو الفساد.. حيكون عيد ميلاده الليلة أسود الأعياد هنوا أبو الفساد
أنا الغلبان بنادي وبقول للجمهور..يوم ممسوخ وعادي..عيدك يا غندور
وبلونك الرمادي خرُبت البيوت..انشالله بشوطة تيجي في الميعادهنوا أبو الفساد
يالا حالا بالا بالا هنوا أبو الفساد.. حيكون عيد ميلاده الليلة أسود الأعيادهنوا أبو الفساد
أنا الكتكت وساكت علي حكمك يا كبير..يا أبو عقل ناصح شرد ملايين
طول عمرك مقاوح ويا الغلبانيين..حكمك صعب جدا علي كل الأجيال
هنوا أبو الفساد
يالا حالا بالا بالا هنوا أبو الفساد.. حيكون عيد ميلاده الليلة أسود الأعيادهنوا أبو الفساد
وأنا مش رايح أغشك يا زعيم كبير..وحقولك في وشك خدتوا فلوس كتير
مين يقدر ينشك يا محظوظ كبير..واحنا لك رعية شايفين العذاب
فليحيا أبو الفساد
إسمعوا يا أحباب..دي العيشة هباب
الواجب علينا نشيله اه بإيدينا ونغني ونقوله
طرطور الجنينة
طرطور الجنينة الجنينة يا مطلع عينينا عينينا
اسمع من الهجامة.. نصيحة الندامة وأهو الفقر جانا وبظلمه اتكوينا
طرطور الجنينة الجنينة يا مطلع عينينا عينينا
جينا لك في دارك بنقولك مبارك وفي ليلك نهارك..بتكذب علينا
طرطور الجنينة الجنينة يا مطلع عينينا عينينا
طرطور الجنينة الجنينة يا مطلع عينينا عينينا

الثانية:خنزيري الحلو(منديلي الحلو) ودي للأسف مهداة للناس اللي حولت موضوع إنفلونزا الخنازير لشكل طائفي بين المسلميين والمسيحيين لدرجة أنهم طالبوا بتدخل أوباما ووقفة إحتجاجية عشان خنزيري الحلو وده طبعا علي أساس أن الفرخة مسلمة والخنزير مسيحي والبقرة هندوسية وخنزرني يا جدع

خنزيري الحلو.. يا خنزيره.. اه يا اخرة غلبي.. بغنيله
خنزيري الحلو.. يا خنزيره.. اه يا اخرة غلبي.. بغنيله
اه يا سيد الخنازير والبق كبير.. أبيض وجميل والجلد تخين
ولا جه دبان هنا واتلملم
خنزيري الحلو
وده لحمه جنان ولا ما بكدب
خنزيري الحلو
اه يا ما أحلي جماله يا خنزيره
لأروح لأوباما وأشكيله
خنزيري الحلو.. يا خنزيره.. اه يا اخرة غلبي.. بغنيله
اه يا قمر من زمان..ع الريحة القاه ع الريحة القاه
والكبد معاه لا وجع ولا اه لا وجع ولا اه
وده أكل ملوك يا هنا يا سعدي
خنزيري الحلو
وده كام فيتامين يانا يا بطني
خنزيري الحلو
في عينيا حشيله يا خنزيره
لأروح لأوباما وأشكيله
خنزيري الحلو.. يا خنزيره.. اه يا اخرة غلبي.. بغنيله
خنزيري الحلو.. يا خنزيره.. اه يا اخرة غلبي.. بغنيله

الثالثة:خنزيرتي الحلوة(أمورتي الحلوة للصبوحة)..يلا خلي الخنازير تهيص شوية في الالبون ودي بقي مهداه لبعض من أصحاب مزارع الخنازير اللي شايفين الخنازير أهم من حياتهم..بس طبعا أتمني الحكومة تعوضهم صح

خنزيرتي الحلوة بقت طعمة بقت طعمة ولها جلد تخين
لتخف اليوم لما بتلعب.. وبتاكل في نجيل
معقولة يا ناس بتسيب بيتها وتروح لبعيد
لو شفتها قوامها حتحتاروا.. تحتاروا تحتاروا
دي شبه الغزال بدلاله..بدلاله بدلاله
واللحمة حتحصل فيها أزمة..ما هو كله بيزيد
علشان هي في سن القاصر ال يعني خلاص
تلعب ويايا وحاكلها قدام الناس
إن قلت أنا باكل لحمها ويا شر اشتر
وأنا حتي لو أقطك أطة أنا أصلا حر
وتتطول قد ما تتطول..وتسمن زي ما تسمن
جوه القلب حتفضل زي الأول وأكتر
لو شفتها قوامها حتحتاروا.. تحتاروا تحتاروا
دي شبه الغزال بدلاله..بدلاله بدلاله
واللحمة حتحصل فيها أزمة..ما هو كله بيزيد
خنزيرتي هيا اللي حبيبتي جايبالي الخيروالفرخة الواحدة بنقسمها علي حتيتين
يا اما نفسي أنا أجي وأشيلها وأحميها من الدبح
وأكتب أنا علي المقلب يافطة ممنوع اللمس
وتتطول قد ما تتطول..وتسمن زي ما تسمن
جوه القلب حتفضل زي الأول وأكتر
لو شفتها قوامها حتحتاروا.. تحتاروا تحتاروا
دي شبه الغزال بدلاله..بدلاله بدلاله
واللحمة حتحصل فيها أزمة..ما هو كله بيزيد
خنزيرتي الحلوة بقت طعمة بقت طعمة ولها جلد تخين
لتخف اليوم لما بتلعب.. وبتاكل في نجيل

الرابعة:أنا خلاص حتجنن(ايس كريم في ديسمبر) وبتحكي عن رأي مواطن مصري ونظرته لإضراب 6 أبريل الماضي(مش شرط تكون دي وجهة نظري)

أنا خلاص حتجنن..تاني إضراب أبريل
أنا خلاص حتجنن..تاني إضراب أبريييييييييل
الناس حاسين بالفقر.. ما دي عيشة زي الطين
الناس حاسين بالفقر.. ما دي عيشة زي الطين
أنا خلاص حتجنن..تاني إضراب أبريل
أنا شفت بنفسي حاجات بتطير مني النوم
لو حسني مبارك مات حيفرح كام مليوووووووون
لو أمن الدولة ده كابس.. أنا اخري رغيف العيش
لو أمن الدولة ده كابس.. أنا اخري رغيف العيش
أنا خلاص حتجنن..تاني إضراب أبريل
أنا خلاص حتجنن..تاني إضراب أبريل
أنا مش مطحون امبارح لكن دايما مطحون
وفي فقري دايما كادح معرفتش غير الخوف
وحعاند أيوة حعاند وأعمل إضراب إبريل
وحعاند أيوة حعاند وأعمل إضراب إبريل
أنا خلاص حتجنن..تاني إضراب أبريل
أنا خلاص حتجنن..تاني إضراب أبريل

الخامسة:تعب الأهالي(سهر الليالي للعملاقة فيروز) ودي تاني مرة تبقي فيروز معانا في جحش فون بعد ما تصدرت أغنية بنت الفقرية التوب هيتس بالألبون اللي فات..المهم الأغنية المرة دي عن حال الشباب العاطل في العصر الميمون اللي إحنا فيه

شو طلعت عين الأهالي والدوا يبقي مصيرهم
وتيجي تلاقيني في قهوة بعيدة.. بكوب المي والُلي
كان معنا دبلوم ماله زي
ويبقي الشغل لازم جي
أبويا دافع لحمه الحي
صرف ونقدية
ويبقوا شباب مكسحة
ده قاعد محتاس.. بطلبيات
فاضيين صايعيين علي طول الطريق
تسرق عربية؟
اااااااه يا تعب الأهالي..اااااااااااه مكنش علي بالي
غني اه غني اه غني علي الصاجات
ياي ياي ياي يا تعب الأهالي ياي ياي ياي مكنش علي بالي
غني اه غني اه غني علي الصاجات
وراحت الأيام وشوي شوي
بلً الدبلوم ونشف المي
وعقلي طار وأدي الذكريات
كله هلس ورغيييييييي
يا تعب الأهالي..اااااااااااه مكنش علي بالي
غني اه غني اه غني علي الصاجات
ياي ياي ياي يا تعب الأهالي
ياي ياي ياي مكنش علي بالي
غني اه غني اه غني علي الصاجاااااااات

السادسة:كان فيه واد إسمه الشاطر عمرو (أغنية الطفولة الرائعة للعبقري مدبولي رحمه الله) وبتحكي عن الخيبة التقيلة اللي حصلت في تصريحات ميدو بيه وعمرو باشا زكي بعد مباراة زامبيا واحنا طبعا ضد تصرفات الاتنين بس يمكن أنا ركزت علي ميدو شوية لأن حميدو بيه عمره ما فاد المنتخب بنكلة ودايما كان ميدو مشاكل وحبيت بس أفكره بواقعه ضربه للاعب نادي الإعلاميين في ماتش ودي وعموما ربنا يستر لأني شايف اللاعيبة مقضياها إعلانات وبس من بعد بطولة إفريقيا..ومن هنا بوجه الشكر لسيادة العقيد أميرالي أركان حرب يوزباشي محمد الكومي علي مساهمته ببيت في الأغنية بس احنا غيرنا فيه كلمة واحدة عشان الرقابة..نياهههه..وربنا أعلم باللي في نيتي..ايوة هما خواجات..حد عنده مانع.نخش بقي ع الأغنية

كان فيه واد إسمه الشاطر عمرو وكمان كان فيه ميدو بشنبات
كان فيه واد إسمه الشاطر عمرو وكمان كان فيه ميدو بشنبات
في ميعاد اللعب إتضح الأمر..طلعوا هما الاتنين خواجات
كان
اه يا واد يا غتيت.. كفاياك تخبيط ..لأعملها عليك وأئلف فيك كده غنواية
كده غنواية
ده عملك إيه يا سعادة البيه رزقه يناديه يتشعلق فيه بالقشاية
بالقشاية؟؟
وشحاتة فاكرهم نصبوا السيرك..ما تشوفوا أحسن طعمة ميلك
وشحاتة فاكرهم نصبوا السيرك..ما تشوفوا أحسن طعمة ميلك
وده كله عشان متربي تمام ولا عمره بيضرب أي لاعيب كان
كان فيه واد إسمه الشاطر عمرو وكمان كان فيه ميدو بشنبات
في ميعاد اللعب إتضح الأمر..طلعوا هما الاتنين خواجات
كان
وده نجم الجيل ابو دم تقيل.. لعبه هلاليل وباصاته كتير كده مقطوعة
كده مقطوعة؟؟
ومعاه التطبيل ومعاه التهليل.. ما هو ميدو خطير وتاريخه كبير في الزربونة
في الزربونة؟؟
ويبص بفخر لذاك وتلك ما هو ويجان أصله بيته الملك
وده كله عشان متربي تمام ولا عمره بيضرب اي لاعيب كان
كان فيه واد إسمه الشاطر عمرو وكمان كان فيه ميدو بشنبات
في ميعاد اللعب إتضح الأمر..طلعوا هما الاتنين خواجااااات

السابعة:ضايعين(راجعين لعمرو دياب) وبتحكي عن نظرة المواطن محدود الدخل في مصر لمستقبل البلد في الكام سنة الجايين في العصر الميمون برضه

ضايعين.. نشحت ونجوع والفقر مخلي حياتنا
ضايعين.. مبقتش بفوق من خوفنا ومن نهايتنا
ضايعين.. نشحت ونجوع والفقر مخلي حياتنا
ضايعين.. مبقتش بفوق من خوفنا ومن نهايتنا
وتعالي تعالي تعالي..ده الحزب الوطني زبالة
وتعالي تعالي تعالي..ده الحزب الوطني زبالة
كل اللي أنا شفته في حكمك.. من بكره حناكل طووووب
وحلمت أننا نتفارق.. ما تسيب أبوس إيديك
مش بس لقتني نايم.. وبقولك طز فيك
وتعالي تعالي تعالي..ده الحزب الوطني زبالة
وتعالي تعالي تعالي..ده الحزب الوطني زبالة
كل اللي أنا شفته في حكمك.. من بكره حناكل طووووب
يا زعيمي بلاش نتعاتب ونجيب سيرة اللي فات
ده مفيش غير المصايب..هي ادي ذكريات؟
وتعالي تعالي تعالي..ده الحزب الوطني زبالة
وتعالي تعالي تعالي..ده الحزب الوطني زبالة
كل اللي أنا شفته في حكمك.. من بكره حناكل طووووب
ضايعين.. نشحت ونجوع والفقر مخلي حياتنا
ضايعين.. مبقتش بفوق من خوفنا ومن نهايتنا
وتعالي تعالي تعالي..ده الحزب الوطني زبالة
وتعالي تعالي تعالي..ده الحزب الوطني زبالة
كل اللي أنا شفته في حكمك.. من بكره حناكل طووووب
ضايعين.. نشحت ونجوع والفقر مخلي حياتنا
ضايعين.. مبقتش بفوق من خوفنا ومن نهايتنا

الثامنة:خوابير(طراطير للعسيلي) ودي بيعبر فيها المواطن المصري عن الأحوال اللي مش عاجباه في مصر بس طريقة أكثر جرأة

خوابير خوابير خوابير
واقفين واقفين واقفين
جاهزين أو مش جاهزين
والله ما فرقتش كتير
صفافير صفافير صفافير
شلة بنات معديين
جامدين أو مش جامدين
والله ما فرقتش كتير
حشيش معاهم دايما في جيبهم
بيشدوا منه ويكيفهم
وما في حد بيسلم منهم
يا تري فين يا لمان طرة
وملايين ملايين ملايين
منهوبين منهوبين منهوبين
مع مين مع مين مع مين
والله ما فرقتش كتير
وطوابير طوابير طوابير
واقفين واقفين واقفين
مستنيين عيش بالمساميروالله ما فرقتش كتير
لما تتهان لازم تزقطط
وأما بتشتكي إياك تعيط
وكل ضابط لابسله أبيض يا تري حيأكلنا الخرا
يا تري حيأكلنا الخرا
نايمين أو مش نايمين
والله ما فرقتش كتير
ولله ما فرقتش كتيروالله ما فرقتش كتير

(Mamma Mia)التاسعة:حرامية
وبتحكي عن الناس اللي سرقت وهربت بره مصر رغم صدور أحكام قضائية عليهم وفي الأغنية دي خصيت بالذكر بتوع المبيدات السرطانية الله يحرقهم مطرح ما هم مرزوعين

هربوا سرقوا دول حيروحوا فين
دول يدخلوا السجنnever mindحتقول
how,will I ever learn بتقولي
كلنا البتاو.. جريوا هما فتحوا المول
بس أتلم ع العالم دول
اه لو.. رحتوا في تعسيلة دي الحيرة.. تقتل
أؤمر.. واخفي التكشيرة والحيرة..أووه
أوووه
حرامية..راحوا بس فين
أحا..دول لازم يتحبسوا
حرامية..هما راحوا فين
أحا..ده احنا اللي بيتختموا
اااه كام واحد طلع كاتت
ااه ما دي كده زاطت
جاي جاي دول لازم يتعدموا
حرامية..أكله خيرنا ياهوه
أحا..ده احنا اللي بيتدبحوا
غشوا المبيدات.. أكلنا اللي جابوه
خيبة فاميلي سايز.. شوفوا الي تشوفوه
كل ده نوم طيب.. اطفوا النور
إصحوا وفوقوا.. كفايانا بقي نوم
هو احنا شرابة ُخرج
اه لو.. رحتوا في تعسيلة دي الحيرة.. تقتل
أؤمر.. واخفي التكشيرة والحيرة..أووه أوووه
حرامية..راحوا بس فين
أحا..دول لازم يتحبسوا
حرامية..هما راحوا فين
أحا..ده احنا اللي بيتختموا
اااه كام واحد طلع كاتت
ااه ما دي كده زاطت
جاي جاي دول لازم يتعدموا
حرامية..أكله خيرنا ياهوه
أحا..ده احنا اللي بيتدبحوا
حرامية..دول يهدوا الحيل
أحا..لكله نفر نفر
حرامية..فين الجزمة يا بيه
جاي جاي..لازم تبقوا عبر
حرامية..راحوا بس فين
أحا..دول لازم يتحبسوا
حرامية..هما راحوا فين
أحا..ده احنا اللي بيتختموا
اااه كام واحد طلع كاتت
ااه ما دي كده زاطت
جاي جاي دول لازم يتعدموا
حرامية..أكله خيرنا ياهوه
أحا..ده احنا اللي بيتدبحوا

العاشرة والأخيرة:يا مرتضي يا مرتضي(يا مصطفي يا مصطفي) وكان لازم الألبون يبقي ختامه مسك عشان إنتخابات نادي الزمالك الشقيق وعلي فكرة الأغنية دي معمولة قبل إستبعاد مرتضي الأخير والأغنية علي لسان أحد أنصاره(مش شرط يكون أنا يعني اللي أنصاره..هع هع)

يا مرتضي يا مرتضي أنا بحبك يا مرتضي
أربع سنين متلطمين امتي حتيجي يا مرتضي
أصحابي قالولي ده راجل تمام وأشوفك بتضرب دايما في الفساد
وأنا مالي ده فريقي تعالالي يا حبيبي
يا مرتضي يا مرتضي أنا بحبك يا مرتضي
أربع سنين متلطمين بين المحاكم والمحاميين
أنا إنتخبك ما أنت حبيبي والله ظلمك كان علي عيني
يا مرتضي يا مرتضي أنا بحبك يا مرتضي
أربع سنين متلطمين بين المحاكم والمحاميين
وإياك مرة تنسي تفتحلي ملفات وتربيلي شوشو بتاع ممدوح عباس
وأنا مالي ده فريقي تعالالي يا حبيبي
يا مرتضي يا مرتضي أنا بحبك يا مرتضي
أربع سنين متلطمين امتي حتيجي يا مرتضي
يا اما حاربت عشانك أنت حتي يا غالي يوم الستة
تعالي يا مرتضي نرجع اللي كان ونرجع نادينا دايما زي زمان
وأنا مالي ده فريقي تعالالي يا حبيبي
يا مرتضي يا مرتضي أنا بحبك يا مرتضي
أربع سنين متلطمين
امتي حتيجي يا مرتضي
امتي حتيجي يا مرتضي
امتي حتيجي يا مرتضييييييي

مع تحيات جحش فون ونلتقي في الألبون السادس وعليكوا خير في شهر 6