الصور دي كلها بمناسبة حادثة غريبة جدا قرأتها في إحدي الجرائد بتحكي عن مهندس مصرس سافر الخليج وعمل قرشين حلوين وعاوز حد يجيبله العروسة بنت الحلال لما يرجع مصر
وطبعا رشحوا له بنت الحلال وشاف صورتها وأعجب بها بجمالها(للأسف ده المقياس الوحيد) وفعلا قابلها وتقدم لها واتخطبوا ولاحظ أنها بتليس ملابس واسعة فضفاضة فإزداد إعجابه بها ولما حانت لحظة الزواج اللي هي طبعا ليلة الدخلة اللي مفيش أهم منها
اكتشف الحقيقة وهي أن عروسته الجميلة شبه الصور دي من حيث العضلات المفتولة
الراجل يا حرام جاتله صدمة هيستيرية وقعد مطرحه مذبهل وبيقولها خبيتي ليه عليا وكأنها عاملة عاملة سودا،فراحت قالت له
أصلي كنت بشيل أثقال زمان
الراجل راح مطلق وطالب تعويض علي البضاعة المغشوشة،راحت هي قالت البضاعة المباعة لا ُترد ولا ُتستبدل ورفعت قضية نفقة متعة
يعني هو اختصرها في مجرد جسم عاوز يتمتع به وهي من الأول وافقت أنها تتجوز زكيبة فلوس راجعة من السعودية والخليج وفي الاخر الاتنين بيعيطوا
السؤال ينقسم للقسمين ونبدأ بالبنات:هل تخافي أن تلعبي رفع أثقال أو أي رياضة عنيفة بدعوي أنها قد تفقدك أنوثتك أو تغير نظرة الرجال ليكي عند الزواج؟
القسم الثاني للرجال:هل توافق أن تتزوج من فتاة تلعب رفع أثقال أو أي رياضة عنيفة ولو لأ ..قول اسبابك بحرية
ملحوظة:محدش يسالني يا مايكل أنت توافق تتزوج واحدة بالعضلات دي ولا لأ وذلك لأني ببساطة مش ناوي أتجوز من اساسه
