تهييسة واقعية

الزمن:ديسمبر 2005
مايكل:لو منتخب مصر جاب بطولة إفريقيا..يبقي أنا حالي حيبقي تمام وحشتغل
النتيجة:شفت دروجبا قال لهارونا المصريين بهدلونا...ولولولوليييييي..مصر تفوز ببطولة إفريقيا عام 2006 في يوم 10 فبراير رغم أن كله كان متشاءم ومتوقع خروجنا من الدور الاول

الزمن:فبراير 2006
مايكل:لو فلافيو جاب جون واحد مع الأهلي..حتروق وتحلي ونحسي يتفك ..أصلي حاسس أني مجتهد زي الواد فلافيلو ده
النتيجة:فلافيو يسجل هدفين عالمين في مرمي بترول اسيوط ويتوج هدافا للدوري موسم 2006-2007 ولا يزال هو هداف الأهلي الأول حتي يومنا هذا

الزمن:أبريل 2007
مايكل:ده لو الزمالك كسب الأهلي ..يمكن يبقي فيه أمل الموازيين في الدنيا تتغير
النتيجة:في مايو 2007 الزمالك يهزم الأهلي 2-صفر بعد ما الأهلي أراح 10 لاعيببين بعد ضمان الفوز علي الدوري

الزمن:يناير 2008
مايكل:ده لو منتخب مصر قدر يحافظ علي لقب إفريقيا..أكيد أكيد حلاقي الشغلانة الصح
النتيجة:منتخب مصر بقدم أحلي عروضه ويتوج بطلا لإفريقيا في 10 فبراير 2008 رغم أن محدش توقع أي خير المرة دي..وطول ما الله معانا حنجيب الكاس من غانا

الزمن:أبريل 2008
مايكل:ده مبقاش فاضل غير أن الزمالك يجيب بطولة بقي عشان أشتغل
النتيجة:الزمالك يتوج بطلا لكأس مصر بعد الفوز علي إنبي 2-1 يوم 25 مايو2008

بقول إيه..طالما أنا سري باتع كده..محدش نفسه في حاجة أراهن عليها؟
ع العموم..أنا قررت بدل ما أفضل معبي جوايا أعمل حلقات عن مغامراتي ومذكراتي في إنترفيوهاتي..بوووووووووووم
أيوة..ده أنا عندي قصص تنفع فيلم كوميدي وبطولة أحمد حلمي كمان وعندي برضه تراجيدي وكله
أصل بصراحة أنا مش حعرف أكتب بوستات في مواضيع جد وكبيرة والحوارات دي لأن خلاص دماغي فضت وبقيت مفلس فكريا واللي متابعني من زمان يعرف أن مواضيعي القديمة كان شكلها إيه
اللي حيفتح الأرشيف ويشوف بداية المدونة مش حيحصدق يمكن بوستات دلوقتي بس عادي ما هو ده برضه التطور الطبيعي للعيشة الوسخة
احم احم يعني
حستني رأيكوا في موضوع حلقات مغامراتي وإنترفيوهاتي..وقولولي تحبوا المدونة تمشي علي هذا الحال..تهيييس وألبونات وكده يعني ولا أتوقف أحسن لما ألاقي موضوع أتكلم فيه بجد