Wednesday, January 21, 2009

الراجل بتاع أم نبيل

امبارح اتصلت بيا الزميلة العزيزة ابي هانم البتنجاني وطلبت مني أشوف لها أسماء المترجمين المعتمدين لدي القنصلية الإيطالية وعنواين مكاتبهم
وبما أن أحلام سيادة اللوز أركان حرب ابي هانم أوامر،فقام حاصول مايكل بتنفيذ المهمة بالإتجاه فورا لمقر السفارة القنصلية بشارج الجلاء(علي فكرة أنا ساكن في باب اللوق..شوفتوا تعبت إزاي)
وفعلا لقيت ورقة متعلقة علي الباب من بره فإديت ميسداية لسيادة اللوز اللي إتصل علي الفور عشان أمليه البيانات
(مش لوا بقي)

ودار الحوار الاتي:
ابي:ملينا يا ابني الأسماء والعنوانين اللي عندك
حاصول:تمام يا باشا
ابي:استني يا ابني اختارلي الأسماء اللي يكون مكانها قريب من مصر الجديدة(شغل لواءات فعلا)
حاصول:تمام يا فندم
وفعلا يتم تملية العنوان
ابي:طب شوفلي بقي عناوين اللي في شارع 26 يوليو
حاصول:فيه أربعة يا فندم واحد اسمه عبد الحميد وواحد اسمه أرميا وواحد اسمه مجدي(علي ما أذكر يعني) وواحدة رابعة اسمها أجنبي
ابي:لأ بلاش التاني ده لحسن مش حعرف أقول إسمه
حاصول :خلاص يا فندم خلينا في الأول ..ما هوإضطهاد عيني عينك(شوفتوا العلاقة دي قبل كده بين لوا وحاصول)
يتم تملية بيانات الأول بعنوانه في شارع عمر بن قتيبة وخط تليفون حودافون

ابي:طب ورينا التاني
حاصول:ايوة كده تعيش الوحدة الوطنية..والله مش ناقصنا غير صورة البابا وهو بيبوس شيخ الأزهر اللي مقدرش ماشوفهاش في الجرنال والا حعيط ونفساويتي تغم عليا
ابي:خلص يلا
حاصول:شفت يا سيادة اللوا أهو أرميا ساكن مع عبد الحميد بالإسم في 26 يوليو بس في شارع إسمه يعقوب قريب من شبرا وكمان واخد خط أم نبيل
ابي:اها هو من بتوع أم نبيل
حاصول:شفتي بقينا في جيتو خلاص...عااااااا
ابي:طب سد سد..هات التالث
حاصول:اشمعني برضه لازم يعني يبقي فيه أغلبية هنا كمان
ابي:هات وخلص ومليني نمرته الحودافونية
حاصول:تمام يا فندم بس عرفت إزاي أنه حودافون
ابي:عيب عليك ما هي باينة زي الشمس
حاصول:طب اديك بالمرة بقي إسم الست
ابي:خلاص عشان متبقوش تعيطوا وقولي نمرتها بتاعة أم نبيل
حاصول:تمام يا فندم وادي نمرتها بتاعة أم نبيل
ابي:غور ياض
حاصول:تمام يا فندم
إنتهي