أنا والزمالك..يا منجي من المهالك

هذا البوست قد يكون للتنفييس أو علي سبيل التهييس وقد يكون للذكري في يوما ما ولكنه لايعبر إلا عن وجهة نظري الشخصية وأتمني أن الموضوع ميأخدش شكل زملكاوي واهلاوي
ايه وجه الشبه بين مايكل والزمالك
كتييييييييير..الزمالك ده أخويا الروحي حتي لو كنت أهلاوي صميم
أولا:الزمالك ومايكل يمران بأحلك فترات حياتهم في الوقت الحالي..فالزمالك تراجع حتي بات مهددا بالهبوط وأنا راجع لنقطة الصفر من تاني لأني خلاص حسيب مكان الشغل ابو ملالييم في نهاية فبراير وراجح لقرف قعدة البيت تاني
الطريف جدا أن أزمة مايكل والزمالك بدأوا في وقت مماثل هو نهاية 2004 مع ملحوظة أن الزمالك بدا قبلي بكام شهروحتي الان احنا الاتنين مخرجناش من أزمتنا
ثانيا:الزمالك ومايكل كلاهما يمثل المادة الخام للنحس،فبالرغم من تواجد الأخطاء داخل الزمالك اللي أدت لوضعه الحالي وووجود عيوب لمايكل كتير إلا أنها ليست بالدرجة التي تضع الزمالك في هذا الموقف،فالزمالك ممكن تلاقيه اتخبط هدف عالمي ممكن اللاعب المنافس ميعرفش يجيبه طول عمره والزمالك عمره ما يجيب أي أهداف في الوقت الضائع بل بالعكس ممكن تلاقي اتخبط جوول يضيع منه الماتش حتي لو لم يكن الفريق سيئا وممكن جدا تلاقي غلطة حكم تطير الماتش من الزمالك وده اللي بيحصل بالمثل مع مايكل ممكن تلاقيه في حاله واتحدفت عليه مصيبة مالوش دعوة بيها انشالله تحرمه من أنه يأخذ 262 جنيه ونص وفجاة تطير منه كل حاجة ويلاقي نفسه بيخسر رغم أنه فعلا عنده أخطائه
ثالثا:الزمالك عاني كثيرا من الصراعات الداخلية بين ابنائه وده كان سبب في دوامته الحالية،وبالمثل عاني مايكل طيلة تواجده لمدة 25 سنة بهذا البيت من حاجات كتير لا داعي لذكرها
رابعا:الزملكاوية حطوا امل كبير جدا في بداية الموسم عند التعاقد مع أجوجو واعتبروه صفقة سوبر حتجيب للزمالك البطولات ولكن خيب أجوجو الامال وراحت الفلوس في الهوا في نفس الوقت اللي مايكل كان حاطط فيه امل علي فكرة معينة أو مشروع لتغيير الكثير من الأمور في حياته وكلن للاسف واضح أن المشروع انهار بنسبة 99%
خامسا:الزمالك دايما عنده عقدة إضطهاد وحاسس ان الإعلام والحكام ضده حتي لو كان الجكم أجنبي فهو جاء للقاهرة خصيصا لظلم الزمالك،وللاسف مايكل عنده حساسية زيادة كان فاكر نفسه بدأ يتخلص منها وهي أنه لما بيحب حد اوي مبيحبش يزعله فلو لاحظ اي تغير ما حتي لو بسيط بيفضل قلقان ومهموم ودماغه بتجيب كل انواع الوساويس اللي في الدنيا
سادسا:كل ما تظهر بارقة امل والناس تقول أن الزمالك راجع من تاني بنلاقيه اتنطر تاني لورا وده نفس السيناريو اللي بيحصل مع مايكل اللي كل ما يفتكر نفسه بدا يحط رجله علي أول سلمة حتي لو سلمة خشب يفاجأ انها اتكسرت من تحت رجله ويلاقي نفسه رجع لورا تاني
سابعا:الإعلام يا اما صدعنا كل يوم ببرامج عن أزمة الزمالك وكل واحد بيطلع يتكلم ويقول حلول وفي النهاية يبقي الزمالك علي ما هو عليه وده نفس اللي بيحصل معايا من 2005 عمال بسمع حلول من شرق وغرب واعمل كذا وبلاش تعمل كذا ولما باجي أنفذ بلاقي الحال فضل علي ما هو عليه ومبقتش عارف راسي من رجلي ولا الحل الحقيقي لعبور الازمة
ملحوظة أخيرة:عشان جرعة الاكتئاب المركزة في البوست أحب أقولكم أني بعتبر نفسي محظوظ في حاجتين
الأولي أني أهلاوي لأني بالوضع ده لو بشجع الزمالك كان زماني مشرف تحت أي كوبري وطبعا عارفين حبقي بعمل ايه..والحمد لله أني بشجع فريق بيكسب حتي لو كان مستواه زي الزفت في ماتشات كتير بس قيراط حظ ولا فدان شطارة يا عم
الثانية أني طلعت ولد مش بنت مع كامل احترامي للبنانيت وده عشان انا مقتنع أن البنت في مصر بتعاني أضعاف ما يعانيه اي ولد والحكاية مش طالباها معايا اني اعاني من نظرات الناس ودماغهم المصرصرة