ألبون: رشحني شكراً

إيماناً منا بدورنا التنويري العظيم في إثراء الثقافة الجحشفونية داخل جميع الأوساط الشعبية، فقررنا نزول العملية الإنتخابية، وأهو رزق الهبل ع العربجية جحش فون تقدم لكم ألبون جديد نازل الانتخابات وخارج تاني "رشحني شكراً"..وطبعاً متنسوش ترشحوا أفضل أغنية وأفضل كوبليه حااااااااااااااااا

الأولى: سايس أمورك يا وزير (سايس حصانك يا أمير) لعلي الحجار "عصر الفرسان" وحنشوف ليه الوزير بينزل انتخابات

سايس أمورك..يا وزير..مالكش أصل صحيح..حقير
شافط جيوب الناس..فلوس..ورافع الأسعار..كتير
سايس أمورك سايس أمورك سايس أمورك..يا وزير
ولو غدر بك الزمان..حتقولي طب إيه العمل
أما الوزارة دي مكان..مالوش أمان لأي حد
ومهما دام بيدوم كتييير..يخرج محدش ينفع
ه سايس أمورك سايس أمورك سايس أمورك..يا وزير
سايس أمورك..يا وزير..مالكش أصل صحيح..حقير
شافط جيوب الناس..فلوس..ورافع الأسعار..كتير
سايس أمورك سايس أمورك سايس أمورك..يا وزير

الثانية: يا بلطجية (يا صهبجية) وهي إهداء للسادة البلطجية اللي بيقوموا بدور كبير في العملية الانتخابية وفيها حنشوف حكاية الوزرا اللي بينزلوا انتخابات كمان، ويستحسن الاغنية دي تتقال بطريقة الشيخ حسني في فيلم الكيت كات وفي ذلك حكمة

يا ملتقي الوزرا..يا لا للي
يا وزرا في السلطة.. يا لا للي
يا مبلطين في القبة تملي
يا بلطجية..إيه يا لا للي
عاوزين شوية..إيه يا لا للي
حاجة م اللي هي..إيه يا لا للي
حبة سنج على سيف على خيبة على لا للي
يهزمني خصمي ما أقول معلشي..يهزمني خصمي ما أقول معلشي
أوري للناس إزاي وشي..أوري للناس إزاي وشي
هي الحصانة شوية عليا
يا بلطجية..إيه يا لا للي
عاوزين شوية..إيه يا لا للي
حاجة م اللي هي..إيه يا لا للي حبة سنج على سيف على خيبة على لا للي
الحزب قاللي مسبشي ولادي.. الحزب قاللي مسبشي ولادي
بقيت أجيب الصوت وأنا راشي.. بقيت أجيب الصوت وأنا راشي
هي الحصانة شوية عليا
يا بلطجية..إيه يا لا للي
عاوزين شوية..إيه يا لا للي
حاجة م اللي هي..إيه يا لا للي
حبة سنج على سيف على خيبة على لا للي
دي مصر دي رايحة في مصيبة..دي مصر دي رايحة في مصيبة
يتحكموا فينا الهبيشة..يتحكموا فينا الهبيشة
شفنا الكوارث ألف وميه
يا بلطجية..إيه يا لا للي
عاوزين شوية..إيه يا لا للي
حاجة م اللي هي..إيه يا لا للي
حبة سنج على سيف على خيبة على لا للي

الثالثة : مكنتش ناوي أرشحك (مكنتش ناوي أودعك) لعمرو وفيها حنشوف حكاية مواطن كان بيفكر بس انه ينتخب الاخوان وازاي المواطن بيحسب العملية الانتخابية عموماً

مكنتش ناوي أرشحك بس أنت مفهمتش وعميت ومحاولتش..تفهمني أو أفهمك
ده أنا كنت لسه بنبهك وبقولك إيه ديا..صعبتها عليا..معرفتش أفهمك
أنا ليه ساعتها مجاش في بالي لومان..لحظة ما قلت إخوان..في الحبس أنا ليه
إزاي أجيبك تفتي هنا على طول..وأنت اللي مش مسئول..دي مصيبة قد إيه
ده أنا لو عليا يا زعيمي عايز الرغيف عندي ومفيش حاجة في قلبي يا ريت تفهم كد
ه ده حكم ليك عمره اتنسى ولا قلت نتخانق..ده أنت اللي بتخانق أحزاب شكلتها
أنا ليه ساعتها مجاش في بالي لومان..لحظة ما قلت إخوان..في الحبس أنا ليه
إزاي أجيبك تفتي هنا على طول وأنت اللي مش مسئول..دي مصيبة قد إيه

الرابعة: توت توت لمدبولي وفيها حنشوف العملية الانتخابية من أولها بتمشي ازاي

توت توت توت توت توت توت
توت توت..أهو جه المسئول..توت توت..بكلام معسول..توت توت..بيهل علينا..توت توت..بأمل ووعوووود
توت توت توت توت توت توت
أهو جه المسئول بس عامل غاغة..بوجبة غدا راح ياخد الهنا
وفاكرها شطارة..توت توت توت
ولا دي دعارة..توت توت توت
وفاكرها شطارة ولا دي دعارة..ما تنضف بقى..خليك مضبووووط
توت توت توت توت توت توت
اه يانا دي الخيبة تقيلة..ما أنتوش جايبنها لبر الليلة
ده أبو سيرة قبيحة..توت توت توت عامل هوليلة.. توت توت توت توت
ده أبو سيرة قبيحة عامل هوليلة..وده كله عشان حيشيل في فلوووووس
توت توت توت توت توت توت
من بعد دناوته وملو جيوبه..من بعد ما حف وجن جنونه
شفتوا اللي حاصل..توت توت توت
يبني في قصوره..توت توت توت
شفتوا اللي حاصل..يبني في قصوره..وحيفضل كده..يخرب في بيووووت
توت توت توت توت توت توت
دوروا على غيري يا مصايب روحي..يا غبا ظروفي..زوروا صوتي
يادي النكبات..توت توت توت
نزلوا على نافوخي..توت توت توت
يادي النكبات..نزلوا على نافوخي..ده الواحد..بس يشوفله تابوووووت
توت توت توت توت توت توت
شفتوا انتخابات..اتغطوا وناموا..واللي يهرج حيشوف بجنابه
شفتوا انتخابات..اتغطوا وناموا..واللي يهرج حيشوف بجنابه
باب زنزانته مفتوح قدامه..وبرضه يجن يطق يموووووت
توت توت توت توت توت توت

الخامسة: شفتوا المآسي (دقوا الشماسي) للعنكئيب "العندليب سابقاً" وفيها حنشوف آثار الانتخابات مع وجود بعض الاسقاطات..واخدين بالكوا

شفتوا المآسي
شفتوا المآسي.. شفتوا المآسي ع البلاد شفتوا المآسي
شفتوا المآسي.. شفتوا المآسي..ده كله لحب الكراسي
شفتوا..شفتوا.. شفتوا المآسي
يا أغبى عصر دي والعة جمر مصيبة جاية
احنا وبلادنا وغلبنا يا مصراوية
واخدين علي حبة قلل خانقين حياتنا
والسجن لو حنموت مراره وليله قاسي
شفتوا المآسي ع البلاد شفتوا المآسي
شفتوا المآسي.. شفتوا المآسي ع البلاد شفتوا المآسي
شفتوا المآسي.. شفتوا المآسي..ده كله لحب الكراسي
شفتوا..شفتوا.. شفتوا المآسي
في البحر الأحمر وفي هداوة لونه الأزرق جيرانا أحسن مننا..وهمومنا تكتر
ونلاحق الخوف والغبا وننام ونصحى
والعدو عارف طبعنا قاعد وراسي
شفتوا المآسي ع البلاد شفتوا المآسي
شفتوا المآسي.. شفتوا المآسي ع البلاد شفتوا المآسي
شفتوا المآسي.. شفتوا المآسي..ده كله لحب الكراسي
شفتوا..شفتوا.. شفتوا المآسي

إلى اللقاء في الانتخابات القادمة

الألبون ال13: أي هبل في الجبل

حاااااااااااااااااااا..جحش فون عادت من جديد ويسرها ويخليها تنهق براحتها وتتفشخر أنها تقدم لكم الألبون ال13 "أي هبل في الجبل"..حد عنده إعتراض؟
المرة دي جحش فون قررت أنها تخليه ألبون صغير ع القد..خمس أغاني متنوعة عشان تعرفوا تركزوا وتختاروا أفضل أغنية وأفضل كوبليه وبالمرة تدونا مقتراحتكم : أعمل ايه في المخزون الكبير اللي عندي..ننزل بالقطارة أي كل أغنية ليها مناسبة مع نفسها ولا بالألبون..حاااااااااااااااا؟

الأولى: أنا بيتي مساكن شعبية (أنا قلبي مساكن شعبية) لمنير وفيها حنشوف كيفية التعامل مع المناطق دي وقت الانتخابات من الحزن الوثني

الحزب نصيبي اه ياني..اداني بطاقة إنتخابية
بالحال النايم غلبان..والحزب مطلعلي عينيا
المهنة بعافر بتهزق..بعيش في منطقة شعبية
المنطقة بايظة ع الاخر..من الاخر عايش في فقري
أنا بيتي مساكن شعبية
الحزب نصيبي اه ياني..اداني بطاقة إنتخابية
بالحال النايم غلبان..والحزب مطلعلي عينيا
المهنة بعافر بتهزق..بعيش في منطقة شعبية
المنطقة بايظة ع الاخر..من الاخر عايش في فقري
أنا بيتي مساكن شعبية

الثانية: أنا مش عندية (أنا مش أنانية) لميريام فارس وفيها حنشوف حكاية بنت دخلت لمكتب العميد عشان تحول لكلية تانية في وسط السنة والروتين الغبي اللي حتصطدم به وخناقتها مع العميد مع ملحوظة أن كلام العميد هو اللي بالأزرق

حول ورقي بس منها..حول حول
لحسن تقرفني وأقرفها..حول حول
قدم ليا في واحدة وبس..واحدة واحدة
علشان فيها دايما حفظ..هى واحدة
أنا مش عاوزة أشيل ترمين..أنا عاوزة أذاكر ساعتين
أنا مش عاوزة أشيل ترمين..أنا عاوزة أذاكر ساعتين
علشان فيها علشان فيها..مذاكرة وحفظ
أنا مش عندية عندية..عندييية..أنا عاوزة أسيب الكلية
أنا مش عندية عندية..عندييية..أنا قاعدة في بيتك مامتي
قرر تبقى حكاية ولا نهاية؟
لو محصلش وعدتٌي الترم..عمر ما زنك ليا يهم
مهما تقولي ومهما تعيدي..إنتي أصلا شايلة الترم
أوعي تقولي كلام مش صح..لا يا فتاتي كلام مش صح
أنت عايشلي وعايش فيها..عايش عايش
ذلك فيا وبتعديها..عايش عايش
كذبك ليا وبتقضيها..كدبة كدبة
لا بترضيني وليه ترميني..صعب تحس
حاطط عقلك ليه ف روتين..ما عشان كده ماحناش فالحين
حاطط عقلك ليه ف روتين..ما عشان كده ماحناش فالحين
لا أنا عندية..لا أنا عندية وحرضى بظلم
أنا مش عندية عندية..عندييية..أنا عاوزة أسيب الكلية
أنا مش عندية عندية..عندييية..أنا قاعدة في بيتك..مامتي
نفسك تبقى خناقة ولا قضايا؟

الثالثة: waving flag
أغنية كأس العالم لنوسا عجرم وفيها حنشوف النصائح الذهبية للشباب في مصر

Ooooooh Wooooooh, Ooooooh Wooooooh
give me freedom .. give me fire
give me reason .. you mean liar!
See the canyon .. leave the field now
you deny us .. make us shout loud
قول للعالم قول وسمع
دي أحلى فكرة سيبها تولع
وحسرتنا في بلوتنا
بنلب بعض أوي ونتقمع
تفكيرنا أناني غدار
تفكير مليان بالظلم
شايفين أننا أشرار
ودي حقيقة مش حلم .. حبيبي
تتعب بعلمك .. مش لاقي حلمك
قوم مد إيدك.. فكر بهبلك ده .. بهبلك ده .. بهبلك ده
when I get older
I’ll cross the border
they’ll give me freedom
just like the waving flag
so, keep your track .. keep your track
كله هجرة السنة دي .. طز فيكي يا بلادي
اللي يفتح عقله يحلم .. بيشقى ويشكى وينادى
in the streets, our souls are stolen
as we see our inhibition
celebration is around us
every nation is above us!
living forever dumb
weeping always under that sun
let's say in that decade
our lives are going to fade
we all say
تتعب بعلمك .. مش لاقي حلمك
قوم مد إيدك.. فكر بهبلك ده .. بهبلك ده .. بهبلك ده
when I get older
I’ll cross the border
they give me freedom
just like the waving flag
so, keep your track..keep your track
Ooooooh Wooooooh, Ooooooh Wooooooh
حبيبي
تتعب بعلمك..مش لاقي حلمك
قوم مد إيدك.. فكربهبلك ده..بهبلك ده..بهبلك ده
when I get older
here's the border
they give me freedom
just like the waving flag
so, keep your track..keep your track
بهبلك ده..بهبلك ده بهبلك ده
Ooooooh Wooooooh, Ooooooh Wooooooh

الرابعة: أيوة يا فوزي (حلوة يا فوزي) لداليدا وفيها حنشوف حكاية "راجل" واطي اسمه فوزي مراته وقفت جنبه وفي الاخر كانت النتيجة كده

سهرة حمرا وُمزتين..أيوة يا فوزي
بيرة حلوة و سيجارين..أيوة يا فوزي
أملي دايما كان يا فوزي..أني أرجعلك يا فوزي
وأفضل دايما جنبك على طووووول
لحقت نسيت كل اللي فات..أيوة يا فوزي
أهلي عملولي حكايات..أيوة يا فوزي
أول حب كان..لفوزي..مش ممكن حنساه يا فوزي
فين أيام زمان.. قبل الجنان
أكلة الفول ع الغداء..كانت أكيد
وكل شغل يدوب شهرين..لازم تسيب
مرضانة بأمل أن احنا نبقي..موجودين
بعقد شغل..ع البحرييين
سهرة حمرا وُمزتين..أيوة يا فوزي
بيرة حلوة و سيجارين..أيوة يا فوزي
ليه عديم القلب يا فوزي..ده أنت بعيد عني يا فوزي
وكل ما بغديك..بسمم فيك
قول يا حبيبي أنت سايبني ورايح فين
ده أنت ندل وحنربيه..يا أبو قرنين
يا لهوي يا عرة فوزي وأنت..في الكباريه
يا ليل يا عين..يا عين يا لييييييل
يا ليلي يا ليلي
سهرة حمرا وُمزتين..أيوة يا فوزي
بيرة حلوة و سيجارين..أيوة يا فوزي
أملي دايما كان يا فوزي..أني أرجعلك يا فوزي
وأفضل دايما جنبك على طووووول

الخامسة: نيجري ليه لمنير وفيها حنشوف حال مشجع مصري مفقوع بعد هزيمة المنتخب من النيجر..نياهاها..عليا النعمة أنا عيل فقر

نيجري بيه نيجري بيه اخييييه
نيجري بيه نيجري بيه اخييييه
لاعبتي كتير مش مضبوطة..دي فرقة هايفة وملطوطة
لاعبتي كتير مش مضبوطة..دي فرقة هايفة وملطوطة..حراااام حراااام
نيجري بيه نيجري بيه اخييييه
ده شحاتة عمره ما تأنى..وكس فريقنا وفقعنا
ده شحاتة عمره ما تأنى..وكس فريقنا وفقعنا..حراااام حراااام
كان نفسي تكسب فرقتنا..سدت طريقنا ونقطتنا
كان نفسي تكسب فرقتنا..سدت طريقنا وونقطتنا.. حراااام حراااام
نيجري بيه نيجري بيه اخييييه
ليه ليه ليه ليه ليه ليه ليييييه
لاعبتي كتير مش مضبوطة..دي فرقة هايفة وملطوطة
لاعبتي كتير مش مضبوطة..دي فرقة هايفة وملطوطة..حراااام حراااام
نيجري بيه نيجري بيه اخييييه

تنويه: أنا بدأت في وظيفة جديدة منذ منتصف أغسطس..عذراً لعدم التواصل على المدونة..أنا ع الفيس بوك عموما
عيد سعيد للجميع

! أسامة خليل وكمال درويش..ودور النشر

مبدئيا كده أنا راجع للبلوج بشكل مؤقت في البوست ده فقط..شكرا لكل اللي سأل بس فعلا أنا واخد قرار بالتوقف عن الكتابة إلا أن الموضوع المرة دي لا يحتمل البقاء في السر، فقلت أجي هنا وأخلع برقع الحياء شوية ونبتدي بالسؤال:
ايه وجه الشبة بين أسامه خليل وكمال درويش ودور النشر في مصر؟

واحد حيجي يقولي إيه العبط ده ..حقوله اتقل شوية لأن التلاتة وجوه لعملة واحدة في مصر وهي الاستعباط..تعالوا نحسبها

- أسامه خليل وكمال درويش عينيهم ع العمل التطوعي في إتحاد الكرة وعشان هما بيموتوا في التطوع بالفطرة، فمفيش مانع كل واحد فيهم يصرف شيء وشوية من جيبه في صورة دعاوي قضائية ودعاية في الإعلام عشان ينول شرف العمل التطوعي الغير ربحي، وهو نفس منهج دور النشر في التعامل مع المدونيين بإقناعهم أنهم أصحاب أعمال متميزة تستحق التحويل لكتاب حتى لو البيه أو الهانم كاتبين مغامرتهم وهما بيحلموا أو حتى رحلتهم اليومية في الميكروباز، وبالتالي تلاقي الناشر متكفل يا حرام بالمصاريف في البداية..ويحيا التطوع !

- أسامه خليل وكمال درويش بيراهنوا على أن اللي قدامهم ناس مغفلين ومصدقين حكاية حب العمل التطوعي اللي بتجري في دمهم، وده نفس اللي الناشر بيفكر فيه عند التعامل مع أي مدون أنه بريالة وأنه مصدق فعلا أن الناشر ده حيشيل الليلة كده لله في الله !

- أسامة خليل وكمال درويش دايما بيرددوا أن هدفهم هو الخدمة العامة وأنهم مختلفين أكيد عن أونكل زاهر الوحش اللي كان ماسك الكرسي قبلهم، وده نفس اللي بيقوله أي ناشر لما يجي يعرف نفسه بأنه أكيد مختلف عن أي دور نشر تاني رغم أنهم كلهم عاملين زي التوأم الملتصق !

- أسامه خليل وكمال درويش عاوزين يقنعوا الناس أنهم مصابين بنوازع مازوخية مستعصية لأنهم بيصرفوا من جيبهم ويضيعوا من وقتهم وجهدهم وبيسيبوا أشغالهم اللي بتجيب فلوس عشان خاطر العمل التطوعي زي بالضبط لو سألت أي دار نشر عن فلوسك كمؤلف فحيقولوا أن السوق نايمة ومفيش كتب ببتاع أصلا علما بأنك ممكن ببساطة تلاقي دار النشر دي بتطلع كتاب جديد كل أسبوع..قلبي معاهم في المازوخية دي !

يلا كفاية كده..أنا راجع تاني للأجازة والمعنى في كرش الناشر..واللي مفهمش اللعبة اللي في البوست ده يبقى مالوش في الكورة لأني المرة دي جبت جول ملعوب حتى لو الحكم في النهاية حيصفر على أنها تسلل !

أجازة مفتوحة

أنا غير قادر على متابعة أي مدونة في الوقت الحالي ومش حقدر أكون متواجد هنا لفترة غير معلومة..ربما أكون أفلست أو في حالة جمود ع الأقل
عموما أنا متواجد ع الفيس بوك والمدونة الرياضية
تحياتي وتمنياتي للجميع بالتوفيق

! عاوز أفشل

احفظها كده..المصحح عاوزها كده..يا عم المهم يديك الدرجة كاملة..عاوز تفهم ليه..احنا يهمنا المجموع وبس

كلمات لا تزال تتردد في أذني منذ إنتهاء فترة الدراسة اللعينة في 2001 وإزاي المصحح ده بالنسبة لي كان الإله اللي خايف دايما من عقابه لأنه ماسكلي كورباج في إيده
!
بفتكر أيام ما كنت أروح المدرسة ويبتدي نظام القهر بطابور الصباح اللي بنردد فيه صفا وإنتباه ونقعد نخبط برجلينا ع الأرض(يمكن نطلع منها بترول ولا حاجة) وبعديها تحية العلم وكل ده تحت تهديد العصا من المشرفين والمدرسيين
واللي يجي متأخر فله الويل والثبور من الست الناظرة وحاشيتها
!
مناهج عقيمة وغبية كل هدفها إزاي تملى الهارد ديسك (الطالب) بمعلومات غير مفيدة وإزاي أعمل
copy &paste
للحاجات دي وامتى أعمل
new folder
وطبعا في نهاية العام الدراسي
format
وكل عام وأنتم بخير
!

فين مساحة تنمية قدرات الطالب الذاتية وإزاي أخليه يفكر ويبدع وإزاي أقدر أطلع أفضل ما عنده إذا كانت مواضيع التعبير مفروضة علينا
اكتب عن إنجازات الرئيس مبارك ومشروع توشكى العملاق(الله يرحمه) – اكتب عن دور ماما سوزان ومهرجان القاهرة للجميع..طبعا ده بخلاف المواضيع التقليدية زي مصر هبة النيل(ولا حتى هبة الأباصيري..مش فارقة)وإزاي أنا بحب وأحترم إشارات المرور(يمكن ده قبل السرفيس مثلا) وعن فرحتك بقدوم الربيع(على اساس أن الخريف ده ابن كلب)..الخ
ده حتى الفرض ماكنش بيبقى في الموضوع ولكن كان بيوصل للكلام كمان
يعني يمكن تفتكروا أننا لازم نبدأ موضوع التعبير بجملة"مما لا شك فيه" وإزاي كانوا(بينصحونا) نكتب كتير حتى لو حنكرر الفقرات..المهم المصحح يشوف الورقة مليانة لأنه أساسا مش بيقرأ..الراجل يا حرام تعبان في عيشته ومش فاضي فبيوزن بالكيلو
!
نسيبنا من التعبير اللي هو اسمه" تعبير" يعني ونشوف امتحانات الرسم اللي هو المفروض قمة الإبداع البشري
صمم بطاقة إنتخابية اكتب فيها "نعم" لمبارك..عبر عن حبك للرئيس مبارك في عيد العمال..الخ
!

إيه الهدف من نظام تعليمي بالشكل ده؟
تخريج قوالب تمشي في تيار المجتمع وقواعده المطلقة دون تفكير أو تمييز..عملية تغييب يعني
!
طب بما أني كنت الأول على المدرسة في قسم أدبي بمجموع 95% وبما أني عميد العاطلين منذ 2005 ومش عارف "أتقولب"..فأنا راجع المدرسة تاني وقاعدلكوا فيها..من الاخر عاوز أفشل
!

! أي كلام فاضي

فرحت بتعيين شيخ أزهر جديد..مهم جدا أن البابا شنودة يلاقي حد يبوسه والأهم أننا كلنا نلاقي الصورة دي في كل الجرايد"القومية
"!

الحل الوحيد في أي بلد محترمة لما يسمى بأزمة مرتضى - شوبير أن لازم واحد فيهم يدخل السجن..غير كده يبقى الحكومة قاصدة تسلينا

الناس مختلفة حول ترشيح البرادعي وعملته بطل من قبل وصوله المطار..طب أنا بقى حرشح العميد حسام حسن..يعني هو اللي يقدر ع الزمالك مش حيقدر على مصر ؟

لا أدري لماذا ربطت فورا بين فيلم "أجورا" وقرار رفض تعيين المرأة في القضاء من مجلس الدولة..كلهن ساحرات؟؟
http://en.wikipedia.org/wiki/Agora_(film)

هاج الجميع وماج لمجرد صدور صفحة ع الفيسبوك تحمل إسم "الله" وقرروا مقاطعة الفيس بوك وكل شوية توصلني دعاوي لجروبات المقاطعة..طب أنا مال دين أمي بالموضوع علما بأني مكنتش عضو في الصفحة دي اللي كلكوا سجلتوا فيها!؟؟

ناقد رياضي خرج علينا في التليفزيون وقال" اه احنا لازم نعترف يا جماعة أننا ضربنا بعثة الجزائر بالطوب بس على فكرة ده كان طوب مش مؤذي"..طوب صيني ده يا كابتن؟

واحد يجي يسألني ليه مش بتروح الكنيسة يا مايكل يوم أحد الزعف..حقوله: عشان مش عاوز أسمع القسيس وهو بيقول "مبارك الاتي بإسم الرب"..هو ورانا ورانا يعني
!

أنا لم أتجاوز في حق أي زميل لي بمجلش الشعب..فقط هو قاللي "يا مشبوه" وأنا قلتله "يا وسخ"..تصريحات للنائب أحمد شوبير
!

هما عمال مصنع أمونيستو لسه معتصمين ليه ونايمين في الشارع كل ده؟؟..أكيد عاوزين يتعملهم فان بيج ع الفيس بوك طبعا
!

أنا ليه كتبت البوست ده أصلا؟..أكيد عشان مش لاقي حاجة تاني أعملها
!

الألبون ال12:غنيلي..شكرا

جحش فون تحييكم من جديد وتتفشخر أن تقدم لكم ألبونها ال12 : غنيلي شكرا وذلك يعد نجاح اخر
ألبوناتنا التهيسية "صحتين وعافية"
http://strugglingmichealitoo.blogspot.com/2009/12/11.html
يلا ما هي كل حاجة بقت شحاتة وفكر إستهلاكي فمفيش مانع عزيزي المستمع أننا نركب الموجة ونقول غنيلي شكرا المرة دي
!
الألبون المرة دي كوكتيل من أفكار متنوعة ساخرة وأي تشابه بينها وبين الواقع فبإعتباري مسئول..فأنا مش مسئول..نياهههه
شكر خاص لأمير مجدي اللي شارك بأغنية أجمل إحساس
وزي ما أنتوا عارفين..كل واحدة /واحد حيختار أكتر أغنية وكوبليه عجبه

الأولى: أصيع ناس (أحسن ناس) لداليدا وحنشوف فيها تقسيمة جديدة لخريطة مصر وفي الاخر حنعرف مين هم أصيع ناس

ادينا بنحشش..ورانا إيه ورانا إيه
من حقنا نفرفش..ورانا إيه ورانا إيه
نحب نستظرف..ورانا إيه
نحب نتحرش..ورانا إيه
ومنين يا بلدينا وبلدكوا إيه؟
أصيع ناس..أصيع ناس
سوهاج بلد المطاريد..سوهاج بلد النبابيت
سوهاج يا حبيبي يا حبيبي
سوهاج..ليها حمل تقيل
سوهاج يابوي عالم محتاج..ينقصله المال
رجالة حبوا يربوا عيال
يا بلدينا..بلدينا
على جامعة بنها يا نور عيني
تعليم وزيري خرب جيلي
بعد الألم والشهادات..جمع الغبا بينه وبيني
على جامعة بنها..على جامعة بنها
اااااااااه..اااااااااه
يا إسماعيلية يا إسماعيلية
الماتش جي في المغربية
أضرب وأكسر أنا وحبايبي
وأروح وأشتم في الأهلاوية
اه يا لالي..فريقي ليه خذلني
فريقي ليه..خذلني
ع المحلة فيه إيه..يا بلد قولي
ع المحلة فيه إيه..يا سبب جوعي
ع المحلة فيه إيه..عمالها تجن
ع المحلة فيه إيه..يا سبب جوعي
إسكندرية يا أجدع ناس
بجدو ماشية بتتفشخر
من حسن حمدي وممدوح عباس
دولا يا عالم شيخ منصر
أيوه يا عالم ع النيلة..ما تسيبوا جدو خلاص لينا
وف 300 ألف مصيبة
خلونا بالعقل نفكر
ياما أغلس شغل الدبان..نادي الزمالك..يا بتنجان
مفروسة منك أوي يا حسام..حتقولوا ده العقد مزور
أما لو جينا على شبرا..دي فقر وولادها جعانيين
ولو نقول حنروح غمرة..سرفيس يفوت ويقول رمسيس
والليل بيستر ويخبي..في همي ويخفف عني
أقوله اه بس يا حسني..وجنب منه أصيع ناس
أصيع ناس..أصيع ناس..أصيع نااااااااس

الثانية :مذيعكوا إنداس (محسبوكوا انداس) لسيد درويش وأي تشابه بينها وبين شخصيات واقعية فهو من قبيل الإستظراف ليس أكتر..حد عنده مانع؟

مذيعكوا انداس صبح محتاس مسحتوا الجوخ يا ناس
مفيش فلوس بقيتوا متعوس فنيتوا خلاص
تسألوا ده ليه يا فندي يا بيه
فاكرلي نفسك إيه؟
مفيس تهييس مفيش تهجيص فنيتوا خلاص
ليه تروحوا تشكوا لدي.. خلى عيشتكوا زي الطين
أيام الهيصة فنيتوا خلاص
مذيعكوا انداس صبح محتاس مسحتوا الجوخ يا ناس
تجيبوا عباس تجيبوا درويش ده غير المر مفيش
ازاي يا فندي امتى وليه بلاها تهجيص
تجيبوا عباس تجيبوا درويش ده غير المر مفيش
أدب مفيش ولد خرسيس حكاوي مفيش
صوتنا يروح لمين..صوتنا يا نصابين
نشكي لمين ولمين اااااه
تنفيس تنفيذ قولوا يا مر انشالله تعيش
فتحتوا جزارة مسكتوا وزارة..ادوني بس أمارة
عشان نشوف البيه منفوخ كأنه خروف
خلينا نشوف فضيحتي كليفتي..المر عمك ياه
شفتوا غباه اللي عماه..خليه في بلاه
إيه إيه كمان كمان..شوف المر بتاع زمان
دلوقتي شوشو يمشيييي..والله يا شورومبو كانت أيام خنيقة كيييك
مذيعكوا انداس صبح محتاس مسحتوا الجوخ يا ناس
مفيش فلوس بقيتوا متعوس فنيتوا خلاص
تجيبوا عباس تجيبوا درويش ده غير المر مفيش
ازاي يا فندي امتى وليه بلاها تهجيص

التالتة :أجمل إحساس للمطربة هاريسا وبتحكي عن محنة الإنسان المصري المزنوق في بلاد الخواجات بدون شطاف في الحمام

أجمل إحساس فى الكون ..بعد ما تشد سيفون..بطنك ترتاح
بعديها تخرج م الحمام..حاسس بأمان وسلام..ووجعك راح
كنت مزنوق زنقة خرا ..وأنا مخنوق بقالي سنة
بعديها باروق م اللى جرى ..حبيبي أنا ..يا حمام الهنا
يا ويلي يا نارى..مش باعرف ادارى
زنقتى ولهفتى على تواليتى وباجرى عليه هوا
بيريح مصاريني..وينسيني أنيني
بيت الراحة بكل صراحة لزنقتى دوا
كنت مزنوق زنقة خرا .. وأنا مخنوق بقالي سنة
بعديها باروق م اللى جرى..حبيبي أنا..يا حمام الهنا
غيرنى بثوانى إحساسى اللى جانى
أول مرة احس شطافي منعش أوي كده
ايه اتمنى تانى فيه كل الأمانى
حمامى مالى الدنيا علىَّ بالراحة و الهنا
كنت مزنوق زنقة خرا .. وأنا مخنوق بقالي سنة
بعديها باروق م اللى جرى .. حبيبي أنا .. يا حمام الهنا

الرابعة: تكتب عليا (تكدب عليا) لماريا اللي بتحب الشيكولاتة والأغنية بتحكي عن بنوتة جدعة رفضت نظرية العريس اللي جاي معبي زكيبة فلوس من الخليج عشان يشوف مزاجه

تطلب في إيديا يا بابا..تشبكها وتجري وراها
وأنا عارفة حتيجي تقولي إيه..إيه
حتقولي أنتي حبيبتي ومفيش في القلب إلا أنتي
تكتب عليا أنا ليه..ليه؟
كل البنات بيك مخدوعين..يا حرام دول مجانين
يا حرام دول مجانين
جاي تقول شيلي الفلوس..ومين بيعرف دي فلوس منين
تكتب عليا أنا ليه..ليه؟
روح شوفلك بت تانية..بتحب القرش وعايزة
كده واحد جاي م الخليج..اه
خليك فرحان يا جنابك..واتمخطر كده بعيالك
وحتندم بكره عن قريب..اه
كل البنات بيك مخدوعين..يا حرام دول مجانين
يا حرام دول مجانين
جاي تقول شيلي الفلوس..ومين بيعرف دي فلوس منين
تكتب عليا أنا ليه..ليه؟

الخامسة: مكنتش ناوي لعمرو وهي تعبير عن لسان حال واحد أراد أنه يرشح واحد من الإخوان ولكن تم ترويقه

مكنتش ناوي أرشحك بس أنت مفهمتش وعميت ومحاولتش..تفهمني أو أفهمك
ده أنا كنت لسه بنبهك وبقولك إيه ديا..صعبتها عليا..معرفتش أفهمك
أنا ليه ساعتها مجاش في بالي لومان..لحظة ما قلت إخوان..في الحبس أنا ليه
إزاي أجيبك تفتي هنا على طول..وأنت اللي مش مسئول..دي مصيبة قد إيه
ده أنا لو عليا يا زعيمي عايز الرغيف عندي ومفيش حاجة في قلبي..يا ريت تفهم كده
ده حكم ليك عمره اتنسى ولا قلت نتخانق..ده أنت اللي بتخانق أحزاب شكلتها
أنا ليه ساعتها مجاش في بالي لومان..لحظة ما قلت إخوان..في الحبس أنا ليه
إزاي أجيبك تفتي هنا على طول وأنت اللي مش مسئول..دي مصيبة قد إيه
أنا ليه ساعتها مجاش في بالي لومان لحظة ما قلت إخوان..في الحبس أنا ليه
إزاي أجيبك تفتي هنا على طول وأنت اللي مش مسئول..دي مصيبة قد إيه

السادسة:جرب نار الشيشة (جرب نار الغيرة) لوردة وسامحيني يا إيمي عشان أنا عارف أنتي بتحبي وردة قد إيه..الأغنية تمت أحداثها في غرزة وبتحكي عن مناظرة تهييسة بين صديقين أحدهما يفضل الشيشة بالموز والاخر يفضل الويسكي..هع هع

جرب نار الشيشة..جرب نار الشيشة وقولي قولي إيه رأيك رأيك..جرب واوصفلي
ضبط كيفك ده أنت حمار..كيفك ده أنت حمار..طعم الموز وف زورك نار..ف زورك نار
طعم الموز و ف زورك نار..ف زورك نار
يا ابني الشيشة هرتني لمزاجك شدتني..وأنا دماغي كلتني ولا حاسس إيه فيا
أتاريك مش على بالك..ما هي بيرتي بتحلالك
قلت أشربهالك وتجربها شوية..وتجربها شوية
خدتك مرة الموسكي..رحت طالبلك ويسكي
لا أعزمه ولا يعزمني..وبيتلزق فيا
شفت وعينك حمرا..كده تأثير الخمرة
كده من أول مرة..طيب شوف التانية..طيب شوف التانية
ضبط كيفك ده أنت حمار..كيفك ده أنت حمار..طعم الموز وف زورك نار..ف زورك نار
طعم الموز و ف زورك نار..ف زورك نار
جرب نار الشيشة..جرب نار الشيشة وقولي قولي إيه رأيك رأيك..جرب واوصفلي

السابعة: يا بابا حسحس يا ماما سوزي(يا ماما حوا يا بابا ادم) لثلاثي ضوضاء المسرح.. وأنا بقول من دلوقتي أن اللي طلب الأغنية دي محمود عثمان..بس خلاص


يا بابا حسحس يا ماما سوزي..عملتوا ليه فينا كده
معانا بلاوي وحكايات..ينفعوا للسيما في روايات
لو مثلناهم زي ما عشناهم..والنبي ينقطوا ألوفات
والنبي ينقطوا ألوفات
سكووووت..كلاكيت..احيييه
من صغري فتحت عينيا على حارة في حي الباطنية..بيقولوا دي عشوائية
وقالولي اركب عبارة واهرب من فقر الحارة
وإن حد بعت شغلانة..ابقى ابعت لينا أمارة
اتاريها سفرية مشئومة ومالهاش مستقبل
أولها بنغرق واخرتها ترجع متبعزق
عنها وفي ليلة..اللعبة اتكشفت..وفي يوم وليلة الحارة اتوكست..وحكومتنا الذكية كرامتها اتهدرت
وجريت من الحارة على الشارع والخ الخ..أطلع من نقرة لضحضيرة ومن فخ لفخ..والدنيا تشيلني وتهبدني طاخ طوخ طيخ طاخ
مبسوط يا بابا حسحس..مبسوطة يا ماما سوزي
لو كانوا سألونا قبل ما يحكمونا..عارفين كنا نقول إيه..إيه؟
كنا نقول إعتقونا علشان يبهدلونا في العهد اللي إحنا فيه
في العهد اللي إحنا فيه
سكووووت..كلاكيت..احيييه
أنا بقى فتحت عينيا ملاقتش غير حرامية..ولقتني بضرب بالطوب..واخد على خاطري ومحروق
أبكي وأولع وأنا متعلم لما قالولي طز فيك..فيييييك
قلت يا حول الله يا قضايا..لألعب كورة وألبس شيك..شيك
ما هي دنيا ماشية العكس..عملتي إيه يا شهادة..كله كان فكس في فكس
ودخلت لقيتها خرابة
نده لواحد كلمه وقاله:خد ده علمه
راح طالع من العصرية في الفضائية..وقايللي دي تشتم فيها كل شوية
وقعد بيعلم في جنابي إزاي الكلمة بتتغش
قال إيه عشان أبقى إعلامي..قلتله ده مكنش يتعز
وجريت من الحارة على الشارع والخ الخ..أطلع من نقرة لضحضيرة ومن فخ لفخ..والدنيا تشيلني وتهبدني طاخ طوخ طيخ طاخ
مبسوط يا بابا حسحس..مبسوطة يا ماما سوزي
لو كانوا سألونا قبل ما يحكمونا..عارفين كنا نقول إيه..إيه؟
كنا نقول إعتقونا علشان يبهدلونا في العهد اللي إحنا فيه
في العهد اللي إحنا فيه
سكووووت..كلاكيت..احيييه
وأنا فتحت حبابي عينيا..شفت الدنيا قاسية عليا
بابا أصله كان مستثمر..رأسمالي بشكل مؤثر
كان نفسه يبيع بالجملة ويعمللي فيها إقطاعي
ولا كنش فيه ناس فقرا يقولوله ليه يا أناني
كان نفسه يبيع بالجملة ويعمللي فيها إقطاعي
ولاكنش فيه ناس فقرا يقولوله ليه يا أناني
يقولوله ليه يا أناني.. يقولوله ليه يا أناني
والحكومة قالت له خد عندك وابقى شيل على قدك
11 قرض يا مان و9 شيكات تمام..غير 7 اتحرقوا كمان..واتدفعوا إكراميات
والحالة اتدهورت وحياتنا اتبحترت..والوالد صحته من الصدمة اتأخرت
وأنا بطلت أكل اللحمة ولقيت الدنيا عضمة..وصرخت وقولت يا أماااااا
وجريت من الحارة على الشارع والخ الخ..أطلع من نقرة لضحضيرة ومن فخ لفخ..والدنيا تشيلني وتهبدني طاخ طوخ طيخ طاخ
مبسوط يا بابا حسحس..مبسوطة يا ماما سوزي
لو كانوا سألونا قبل ما يحكمونا..عارفين كنا نقول إيه..إيه؟
كنا نقول إعتقونا علشان يبهدلونا في العهد اللي إحنا فيه
في العهد اللي إحنا فيه.. في العهد اللي إحنا فييييييييييييييه

الثامنة: أكلي ظفر (مالي صبر) لعاصي الحلاني وده لينك للتذكرة
http://www.4shared.com/file/117309896/7bdf8a3/_____.html?s=1
وبتحكي عن قصة رجل يعاني من السمنة المفرطة بسبب أكل الظفر فحنشوف حواره مع الطبيب مع ملحوظة أن كلام الطبيب باللون الأحمر

أكلي ظفر يا ناس..لا لا تلوموني
بأكل ف صحن كباب..مع بابا غنوجي
يا زبون ف الحاتي..شفتوا أهو حالي
ماطرح ما هو الحاتي..للحاتي ودوني
أكلي ظفر بخضار..دايما يتعبني
والجسم راح وانهار..مصراني يقتلني
شفط الدهون يا خي..ليدبسك بطنك
ما الغلب رايح جي
همك علي بطنك
يا زبون ف الحاتي..شفتوا أهو حالي
ماطرح ما هو الحاتي..للحاتي ودوني
حلفتك بإبنك..يا طبيب تشفيني
أصل الغدا قرب..أوعاك تواسيني
خلي الُبطن جعان..ما تزن بخرابه
مثلي أنت جوعان؟
همي علي أتعابي
يا زبون في الحاتي
حاسب علي أتعابي
ماطرح ما هو الحاتي..للحاتي ودوني
أكلي ظفر يا ناس..لا لا تلوموني
بأكل ف صحن كباب..مع بابا غنوجي
يا زبون في الحااااااااااااااتي
حاسب علي أتعااااااااااااابي
يا زبون ف الحاتي..شفتوا أهو حالي
ماطرح ما هو الحاتي..للحاتي ودوني
أكلي ظفر يا ناس

التاسعة: خدني بين إيديك للكابو حميد الشاعري ودي بمناسبة نهاية معرض الكتاب وحنشوف فيها ماذا يمثل المعرض لغالبية الزائرين
http://www.mawaly.com/music/Hamid+Alshiri/track/1983

خدني بين إيديك..وديني لمعرض الكتاب
خدني بين إيديك..طبخالك حلة الكباب
أكلي بين إيديك
طلعلي اللحم جوه صاج..وريني المحشي والفراخ
دقية بامية يا سلام
سيبنا م الكتاب..قرفتنا مذاكرة السنين
سيبنا م الكتاب..لو عشنا أهو متشحتفين
سيبنا م الكتاب..دي فتاوي وهجص واشتغال..وكفاية علينا الفراخ
والرز أبو خلطة ده خطير
خدني بين إيديك..وديني لمعرض الكتاب
خدني بين إيديك..طبخالك حلة الكباب
أكلي بين إيديك
طلعلي اللحم جوه صاج..وريني المحشي والفراخ
دقية بامية يا سلام

العاشرة: إرجع بالذوق(إرجع للشوق) للمطربة هاريسا وفيها حنشوف قصة بتكرر كتير في الفترة الأخيرة عن معاناة زوجة جوزها هرب وسافر وساب المسئولية عليها وحدها

إرجع بالذوق يا اللي أنت راميني وسايبلي ف ويل البيت..أصرف
أصرف ف أيام بتقضيني
ده ف قلبي التار وأنت اللي كاويني وساقيني مرار وغباك يوجع
ربي الأولاد وبترميني
والغربة معاك..تقلب حالي..قلتلي هناك يرتاح بالي
أنت الغايب أيوة الغايب..أنت اللي قارفني ومجافيني
يا شاغلني عليك..أبوس في إيديك..وأنا ياما الغلب أذاني
ياما ياما شكيت..من دخله قسيت..ولا ليلة ارتحت يا غالي
ظلمك ياما ياما..ياما أذاني..في الحيرة بيتني بعاني
ارجع تاني..ارجع تاني..ارجع يا حبيبي ولاغيني
حظي ومعروف..غيرك ما حشوف..وأكيد للظلم..نهاية
وحقول ده نصيب..راح يبقى غريب..وعذابك وحده كفاية
راح أدوق المر..اه يا حبيبي
برضك يا حبيبي أنت نصيبي..أنت حبيبي أنت نصيبي
أنت اللي قارفني ومجافيني
إرجع بالذوق يا اللي أنت راميني وسايبلي ف ويل البيت..أصرف
أصرف ف أيام بتقضيني
ده ف قلبي التار وأنت اللي كاويني وساقيني مرار وغباك يوجع
ربي الأولااااااااااد

يعني إيه عذرية؟

مبدئيا البوست ده ليس الهدف منه محاولة فرض وجهة نظري أو الترويج لأي فكرة ما، فأنا لا أؤمن بفرض وجهة نظري على الاخريين أو فرض الاخريين لوجهة نظرهم علىً لأن أساسا مفيش شيء مطلق.

في مرة،كان واحد صاحبي بيكلمني وبيأخد رأيي في نوع العربية اللي ممكن يشتريها علما بأنه قرر يشتري عربية مستعملة وبما أن خبرتي في العربيات لا تزيد كثيرا عن خبرتي في الميتافيزيقا، فقلت له أني لا أحبذ فكرة شراء عربية مستعملة أبدا خصوصا أنه عنده القدرة المادية أنه يجيب بنفس الثمن ده عربية ع الزيرو وبعدين كفاية إحساس أنه أول واحد يركبها.
صاحبي رد بسخرية وقال" أنت محسسني أني حجيب عروسة مش عربية"
قلت له بدهشة " وإيه علاقة عربية ع الزيرو بواحدة أنت حتتجوزها؟"
فكان رده "الإتنين لازم يبقوا ع الزيرو عشان تبقى أنت أول واحد تستعملهم بس أنا في العربية معنديش مشاكل أنها تبقى مستعملة"
هنا بقى رديت بمنتهى البرود " بس أنا مستحيل أقبلها في العربية حتى لو كانت بي إم"
الحوار بدأ يسخن وقاللي " يعني ممكن ترتبط بواحدة
second hand؟"
طبعا الحوار إنتهى عند الجملة دي لأني حسيت أن مفيش نقطة مشتركة ممكن نتناقش فيها من الأصل بس قعدت أفكر في كام نقطة مع نفسي:

يعني إيه عذرية؟
غشاء البكارة؟؟..طب ما هي كده يبقى مفهوم العذرية ده للبنات فقط دون الذكور
طب ما هو لو البنت فقدته نتيجة علاقة جنسية عادة العلاقة دي حتكون مع ذكر ، يبقى ليه مش حنوجه اللوم هنا للذكر ويبقى الموضوع ده وصمة عار للأنثى فقط؟

طب لو قولنا فيه عذرية للذكر..يعني إيه؟
يعني ميعملش علاقات جنسية قبل الزواج؟؟..طب ما هو ممكن يقضيها فرجة على مجلات وأفلام بورنو أو ينزل يعاكس أي واحدة مش عاجبه طريقة لبسها أو يتحرش بها أو حتى يشتهيها في نفسه..كده بقى إنسان محترم عشان معملش علاقة جنسية قبل الزواج؟

طب هو ليه أصلا فقدان غشاء البكارة وصمة عار للأنثى؟
علشان علاقة جنسية قبل الزواج بأوراق رسمية؟؟..طب ما هي ممكن البنت تفقده لأي سبب تاني حتى لو كان السبب ده تعرضها لإصابة في رياضة قتالية مثلا
يبقى في الحالتين دول البنت تُوصم بالعار؟

طب لو البنت اتصرفت وصلحت الموضوع؟
اه كده المجتمع حيعتبرها الشريفة العفيفة وأنها تستحق أن تنال لقب زوجة وأم حتى لو كانت عاملة 20 عملية ترقيع ولا مستخدمة غشاء صيني..بلاش كده ممكن جدا البنت دي يكون لها علاقات كتير قبل الزواج لم تصل فيهم لمرحلة الإتصال الجنسي الكامل(يعني بالبلدي كده بوس وأحضان أو حتى
oral/anal sex)
وتبقى برضه عفيفة عشان غشاء البكارة لسه في حالته..مش نفاق ده؟

هو ليه كلمة "عذرية" دي اللي بنستخدمها بتكون دافع لجرائم وحشية بنسميها جرائم شرف؟
يعني لو راجل إكتشف ليلة دخلته أن زوجته "غير عذراء" من حقه يقتلها ويبقى هو الضحية في هذه الحالة وتبقى المجني عليها مجرد عاهرة نالت عقابها التي تستحقه؟؟

الخلاصة إيه من كل ده؟
مفيش حاجة إسمها عذرية لأن المجتمع اللي يختزل معاني الشرف كلها في غشاء جلدي رقيق يبقى مجتمع مريض
فيه فرق كبير بين إنسانة ترتبط بيها ويبقى فيه حياة مشتركة ما بينكوا وما بين عربية تستعملها وممكن تركنها زي ما أنت عاوز وترجعلها في أي وقت وتلاقيها عربية برضه
!

المختصر المفيد في حكاية العميد

أهلا بيكوا..شكرا لكل اللي سأل عني في البوست اللي فات واللي قبله
وشكرا للتهاني بخصوص الكتاب
مبدئيا الكتاب(وظيفة ما تمت) دلوقتي في مكتبات عمر بوك ستورز (أعلى مطعم فلفلة 15 ش طلعت حرب) ومكتبة البلد (31 ش محمد محود أمام الجامعة الأمريكية بميدان التحرير) ومكتبة ادم(محل 124 بالمعادي جراند مول) ومكتبة ألف( 132 ش الميرغني هيلوبوليس) وحاليا بمعرض الإسكندرية للكتاب

نخش بقى في الموضوع

أنا مش كاتب..أيوة ما هو مش أي حد نزل كتاب بإسمه خلاص يأخد اللقب..على كده يبقى المأذون شيخ الكتاب كلهم..على رأي الزميلة العزيزة رحاب
معلش أنا مش بحب أخد لقب مش من حقي..أنا عميد وخلاص..عميد العاطلين زي ما أنتوا عارفين من سلسلة مغامراتي في إنترفيوهاتي
وبعدين لا كل من إعتزل كورة بقى إعلامي ولا كل من تخطى الستين بقى حاج ولا كل اللي نزل تحت عربية بقى بشمهندس..وصلت؟

سؤال لطيف: ليه الكل إفترض أني سعيد بما أن فيه كتاب نزل في السوق بيحمل إسمي عليه..نصيحة: بلاش إفتراض القواعد المطلقة معايا
مش شرط اللي ممكن يبسط ناس كتير أنه يبسطني أنا
مش معنى كده برضه أني زعلان
!

أغلبكم تابع موضوع الكتاب هنا ع البلوج وعارفين أنها حدوتة الإنترفيوهات الفاشلة اللي عملتها منذ التخرج في 2005 بس أنا لاحظت أن الموضوع قد تسبب بطريقة ما(دون قصد مني) أنه عقد البعض من اللي لسه متخرجين أو على وشك وخلاهم يشوفوا الدنيا سودة..لأ الحكاية كلها نسبية وشخصية بحتة
مش شرط عشان حصل معايا كده يحصل معاكي /معاك نفس الحدوتة
اطمنوا: كل دفعتي وما بعدها حتى دفعة 2009 إشتغلوا وفي مناصب مرموقة كمان ومش كل اللي إشتغل فيهم كان بواسطة..يعني أظن مفيش دليل أوضح من كده واللي لسه خايفة / خايف من حواديت الإنترفيوهات يبقى يستاهل اللي يجراله بعد التخرج

في لغة الكورة( اللي أنا بفهمها كويس) لما فريق بيغيب عنه الإنتصارات لفترة طويلة بيبتدي يخش في أزمة ثقة مهما كان مستوى المنافس قدامه ده غير زيادة الضغط عليه لو كان نادي يتمتع بجماهيرية كبيرة ، وده كان سر أزمة نادي الزمالك الشقيق طوال السنوات الخمس الماضية لحد ما جه العميد حسام حسن..و
كله يفهمها زي ما عاوز بقى..هع هع

أخيرا..قد يبدو البوست كئيبا ودمه تقيل بس معلش الكلام في الموقف ده مينفعش يتقال غير كده..عموما دي اخر مرة أفتح فيها سيرة عن حوار الإنترفيوهات هنا وبعد كده حصدعكوا ببوستات في مواضيع مختلفة خالص
بس خلاص على رأي الأديب شعبان عبد الرحيم

تنويه

معلش يا جماعة اعذروني بجد..البوست ده مجرد تنويه عن الكتاب لأن فيه ناس عاوزة تعرف هو نازل فين وامتى
سامحوني لأني مستمر في فترة الأجازة والإنقطاع التام عن المدونات وبجد مش حقدر أتواصل مع حد في الوقت الحالي ولكن أوعد أني ححاول أرجع في أقرب وقت ممكن
شكرا لكل اللي سأل عني..عموما بس أحب أوضح أني مش مختفي بسبب شغل...لو فيه شغل حقول على طول
:)
الكتاب بقى اسمه وظيفة ما تمت وحيكون موجود بمعرض الكتاب يوم 27 من الشهر الحالي بدار أكتب صالة 3 علوي ودار العين صالة المانيا بسرايا 6 والعالمية للنشر والتوزيع المانيا بسرايا 6 ودار كيان سراي كندا وبعد كده الكتاب حيكون موجود بالمكتبات بشكل طبيعي

تحياتي للجميع

أجازة

مش حقدر أكون متواجد ع المدونة هنا ولا حقدر أكون متابعكم الفترة دي..اعتبروها مجرد فاصل أو فترة إستراحة وبعدها يمكن أرجع تاني

تحياتي للجميع

وظيفة ما تمت

بلغني أيها الملك السعيد ذو الرأي الرشيد أن الواد العميد سيصدر له كتاب جديد إسمه "وظيفة ما تمت" طالما الجماهير إهتمت

زي ما أنتوا شايفين مغامراتي في إنترفيوهاتي ستتحول من عالم المدونات والفيس بوك إلى كتاب ورقي ستصدره دار المصري للنشر
الكتاب حيكون فيه سلسلة الحلقات اللي أنتوا شاركتوني فيها هنا في المدونة مع بعض الإضافات.

بشكر كل واحدة / واحد دخلوا هنا وسابوا تعليق سواء كان نقد أو غيره،وأقدر أقول أني سعيد أني إستطعت أن أرسم البسمة على وجوه البعض حتى لو كان ده تم بدون قصد مني، وعشان كده فيه حلقتين مني نازلين ع المدونة قريبا
cadeau

أتمنى الكتاب يحوز إعجابكم وتجدوا فيه كل ما هو مفيد بعيدا عن مسألة التعقيد اللي كتير حسها بسبب تكرار الفشل في الإنترفيوهات ودي حبقى أوضحها قريبا.

تحياتي

!! كلنا ليلى(4):أنا وليلى

اتكلمنا كتير في البوستات الثلاث الماضية عن ليلى في مجتمعنا والصورة التي يقدمها بها من يشكلون ما يسمى بالوعي العام وما تعانيه ليلى من قيود وأعباء إضافية بالمجتمع ولكن هنا حطرح سؤال مهم: هل ليلى ضحية دائما؟
بصراحة لأ..أحيانا كثيرة أجد أن ليلى هي من تظم ليلى
أقولكم مثال بسيط حصل على أرض الواقع كتير: ليه لما بنت تتعرض لتحرش جنسي أو حتى معاكسة سواء في الشارع أو في مواصلة عامة ، نلاقي الأغلبية بتلومها والمصيبة الكبرى لما تلاقي ست زيها هي اللي تقولها" ما تشوفي نفسك لابسة إيه أو حاطة في وشك إيه"..الخ الخ
يعني هنا بدل ما تكون الست دي هي أكثر من يشعر بما تعانيه امرأة مثلها في مثل هذا الموقف الغير ادمي ، نجدها تضيف أعباء إضافية عليها، وده عادة له إحتمالين
:
إما "نفسنة"(غير مرتبطة بنوع الإنسان سواء أنثى أو ذكر) بمعنى إخراج مخزون من السادية أو الحقد أو الكبت على شخص تشعر أنه في موقف ضعيف
أو إما بيكون سببه أن هذه الأنثى ُمسخت شخصيتها نتيجة التربية السلطوية القمعية التي تعرضت لها منذ نشأتها، وبالتالي لازم يبقى الكل زيها من وجهة نظرها في عقلها الباطن
طب ما هنا حتيجوا تقولولي ما أنت حطيت ليلى من تاني في خانة الضحية فقط؟؟
نعم هي ضحية إذا أرادت ذلك..بمعنى أنا موافق وأقر أن أغلب البنات بيتعرضوا لضغوط المجتمع الأبوي منذ نشأتهم وُتفرض عليهم قيود في كل شيء بس إيه الفارق بين الإنسان والحيوان؟
الإرادة والعقل الحر
لازم ليلى من نفسها تقتنع أنها كائن مستقل غير خاضع لسيادة المذكر بداعي أنه الأقوى والأكثر معرفة والقادر على حمايتها..لازم تحاول توجد لنفسها شخصيتها المميزة المستقلة التي تبدأ بإستقلالها المادي، تواجه المجتمع..تثور عليه..ترفضه..ما تستسهلش الحياة في دور الضحية والمفعول به
يعني مثلا : ما نلاقيش واحدة كل هدفها في الحياة تتجوز الراجل الغني اللي يصرف عليها ويجيبلها أحسن لبس وبعد كده تشتكي وتقول "أصلي حاسة أنه مش بيحبني وحاسة أنه بيعاملني زي أي شيء موجود في البيت"
طب ما هو من الأول أنتي اللي إخترتي تتجوزي زكيبة فلوس ومدورتيش على اللي يحبك بجد ويتعامل معاكي كإنسانة،ولهذا فدائما ما أنحاز لمفهوم الزواج الغربي القائم على 50-50 أي مشاركة الطرفين بالتساوي في تأسيس منزل الزوجية
!
بلاش كل الكلام ده..وأتكلم معاكوا بشكل شخصي شوية

أنا مثلا لو جه حد من 9 سنين وقاللي إكتب موضوع عن ليلى وحقوقها..الخ، كنت حعتبره مهبول ومختل عقليا، ففي هذا الوقت كنت إنسان تافه بلا أي مضمون وغير مقتنع بفكرة وجود أي شيء غير سيادة المذكر على كل مجالات الحياة ولكن لما بدأت أخرج من شرنقة الحياة المتمثلة في كتاب الوزارة وكتاب النماذج والمجموع والمصحح عاوز كده وتقاليد العائلة والمدرسة..الخ،بدأت أفهم وأستوعب فكرة أن الأنثى كائن له وجود وبدأت اسأل نفسي ليه أنا كنت خايف منه بالشكل ده وعامل الحاجز الوهمي ده بيني وبينه، وبمرور الوقت وإختلاف الرؤيا لأشياء كتير،تحول الموضوع عندي لأصبح مقتنعا بأهمية التكامل والمساواة المطلقة بحيث تتحول المعادلة من الندية بين الطرفين إلى
A feminine side + masculine strength = A perfect human
thus a perfect human=idealistic society or at least a fair society!
بمعنى إذا كنا نرى أن الذكر يتمتع بالقوة الناتجة عن تكوينه الجسدي فليه متبقاش القوة دي ممزوجة بجزء العاطفة الأنثوية حتى يكون جدير بلقب إنسان ونتجنب ما سببته هذه القوة الغاشمة من ظهور الحروب والمجاعات والنظم السلطوية القمعية والدول الثيوقراطية وفي نفس الوقت ليه متكونش الأنثى متحلية بالقوة في تصرفاتها مع التمسك بكل مميزاتها الأنثوية بحيث تكون جزء فعال ومساوي دائما للذكر في المعادلة؟

أعتقد أن دي أصعب معادلة ممكن تصل إليها البشرية يوما ما وغالبا لن تصل لأن حتى الان لا تزال السيادة المطلقة للذكر بداعي أنه صاحب الإختراعات والتفوق في كل المجالات،ولكن للأسف محدش حاول يأخد باله من حقيقة هامة وهي أن المرأة على المستوى العالمي ظلت مهمشة تماما حتى بداية الثورة الصناعية في أوروبا في أواخر القرن ال18
فإزاي هنا حيكون لها نفس تواجد الذكر في باقي المجالات وهي تعامل ككائن ناقص:ممنوعة من العمل والترشيح في البرلمان والإدلاء بشهادتها في المحكمة..الخ
يعني المرأة منذ هذا الحين بدأت تتحول من الجارية إلى عنصر مشارك في المجتمع ومع نهاية الحرب العالمية الثانية،بدأت المرأة فعليا في التواجد في كل المجالات اللي كانت محظورة عليها،فظهرت شخصيات نسائية بارزة مثل:إيفا بيرون ومارجرت تاتشر وماري كوري وبينظير بوتو وجميلة بوحيرد وكثيرات غيرهن ممن تحولن لرموز مشرفة في مجتمعاتهن والعالم بأسره
!
وبالرغم من ذلك، فإن عدد النساء الأميات في العالم يبلغ 850 مليون وهو ضعف عدد الذكور الأميين
!
وبالتالي أرى أن هذه الفترة لا تزال قصيرة جدا للحكم بأن الرجل وحده هو صاحب الفضل فيما وصل إليه التقدم العلمي الان لأنه ببساطة مقدرش أقارن بين طرف تمتع بكل حقوقه طيلة 21 قرن بطرف بدأ يتواجد على الساحة منذ بضعة عقود
!
وده عكس الوضع تماما في حضارات ما قبل التاريخ بالمجتمعات القديمة زي الفراعنة والسومريين والفرس والإغريق وليس هناك دليل على ذلك أبرز من تواجد آلهة من الإناث في هذه المجتمعات (إيزيس ونفتيس وعشتار وبيرسيفوني وأفروديت وإيريس وهيرا..الخ) قبل أن يأخذ الإله صفة المذكر بعد ظهور الأديان
!
كلمة مهمة حقولها في نهاية الموضوع لليلى أي كان مكانها: لا تنتظري شيئا من المجتمع لأن الفكر ده مستشري فيه للغالبية العظمى لدرجة أني في مرة كنت بدردش مع زميل على درجة عالية من الثقافة والمستوى التعليمي وجينا لجملة"أنا مش حتجوز" لأجده يرد عليا بقوله "أمال حتتصرف إزاي"
وهنا أدركت للأسف أن المرأة في مجتمعنا هي البديل الطبيعي لعملية الإستمناء
masturbation
!
صدقيني مهما أنا أو ملايين غيري كتبوا كلام عنك وحاولوا يشرحوا حقيقة وضعك في هذه المجتمعات، فلن تحصلي على حقك إلا إذا أردتي، فالحرية تؤخذ ولا ُتمنح
وأخيرا لن أجد ما هو أفضل لختام سلسلة البوستات دي غير جملة قالتها الزميلة العزيزة سارة نجاتي
فى تصورى , أنك تحتاج الى أن تكون مكان الأخرين لتشعر بمعاناتهم , و تحتاج الى أن تكون انسان أولا حتى تشعر بمعاناة الأخرين دون أن تكون فى مكانهم
http://baniadmeen.blogspot.com/2009/04/blog-post_11.html